Baş Assambleyanın sədri Annalena Berbok təşkilatın əsas missiyasını davam etdirməkdə israrlı olub...
Poliqon xəbər verir ki, BMT Baş Assambleyasının 80-ci sessiyasının sədri Annalena Berbok təşkilatın Ukrayna və Yaxın Şərqdəki münaqişələri həll etmək niyyətindən əl çəkmədiyini bəyan edib. Onun sözlərinə görə, BMT indiyədək olmadığı qədər “sülh və təhlükəsizliyi təmin etmək” öhdəliyinə sadiqdir.
“Biz yalnız geri çəkilmirik, əksinə, BMT-nin ən mühüm vəzifəsini – dünyada sülh və təhlükəsizliyi qorumaq öhdəliyini hər zamankından daha böyük əzm və qətiyyətlə yerinə yetirməyə hazırıq”, – Berbok vurğulayıb.
Bundan əvvəl BMT-nin baş katibi Antoniu Quterreş Baş Assambleya çərçivəsində 150-dən çox ikitərəfli görüş keçirməyi planlaşdırdığını bildirmişdi. Məqsəd dünya liderlərini birbaşa dialoqa təşviq etməkdir.
Digər tərəfdən, Rusiya rəsmiləri Annalena Berbokun seçilməsinə kəskin etirazlarını davam etdirirlər. Rusiyanın BMT-dəki daimi nümayəndəsinin birinci müavini Dmitri Polyanski onun “kəskin rusofobiyası” və “qeyri-adi bəyanatları” ilə yadda qaldığını deyib. Rusiya Xarici İşlər Nazirliyinin rəsmi nümayəndəsi Mariya Zaxarova isə Berbokun seçilməsini “biabırçılıq” adlandıraraq, onun “üçüncü reyxin tərəfində vuruşmuş babası ilə fəxr etdiyini” xatırladıb.
Poliqon.info
