Ədliyyə və Ekologiya və Təbii Sərvətlər nazirliklərinin, Azərbaycan Respublikası Gənclər Fondunun, Azərbaycan Həmkarlar İttifaqları Konfederasiyasının, Aqrar, Ekologiya və Su Təsərrüfatı İşçiləri Həmkarlar İttifaqı Respublika Birliyinin, "Coca-Cola" şirkətinin, "Ədliyyə Könüllüləri" İctimai birliyinin və "Gənc Könüllülər" İctimai birliyinin birgə təşkilatçılığı ilə “Ecoguard” ekoloji maarifləndirmə düşərgəsinə start verilib.
Açılış mərasimində ekologiya və təbii sərvətlər nazirinin müşaviri Rüstəm Həsənov, ədliyyə nazirinin müşaviri Tağı Eynullayev, Azərbaycan Həmkarlar İttifaqları Konfederasiyasının sədrinin müşaviri Cəmaləddin Quliyev, həmçinin Azərbaycan Respublikası Gənclər Fondunun Daxili Nəzarət və Monitorinq şöbəsinin müdiri Pərviz Mirələmli çıxış edərək layihənin məqsədləri, qarşıya qoyulan vəzifələr və iştirakçı gənclərin ekoloji sahədə bilik və bacarıqlarının artırılmasına yönəlmiş fəaliyyətlər barədə ətraflı məlumatlar verilib.
Düşərgə çərçivəsində panel görüşlər keçirilib, iştirakçılarla ekoloji maarifləndirmə, iqlim dəyişikliyi və ətraf mühitin qorunmasında gənclərin rolu müzakirə olunub, onların sualları cavablandırılıb.
Daha sonra İdeaton sessiyasında gənclər iqlim dəyişikliyinin yaratdığı çağırışlar, sahil ekosistemlərinin qorunması və sahilyanı icmaların davamlı inkişafı mövzusunda fikir mübadiləsi aparıblar.
Komandalar iqlimə uyğunlaşma, ictimai maarifləndirmə, tullantıların idarə olunması və biomüxtəlifliyin qorunması istiqamətində yaradıcı təkliflər təqdim ediblər.
