Evimizdə xoş və funksional yemək mühiti yaratmaq üçün doğru masa seçimi böyük önəm daşıyır.
Pravda.az bildirir ki, büdcənizə uyğun, möhkəm və uzun müddət sevərək istifadə edəcəyiniz bir masa seçmək istəyirsinizsə, bəzi əsas məqamlara diqqət etməyiniz vacibdir.
Mövcud trendlərə aldanmayın
Mebel mağazalarında masalara baxarkən yalnız qiymət və estetik görünüşə deyil, həm də strukturun sağlamlığına diqqət yetirin. Masanın oturmasının rahatlığı, uzun müddət istifadədə nə dərəcədə əlverişli olduğu və zəminlə uyumu kimi faktorları da nəzərə alın.
Ölçüsü – Ən vacib qayda
Yemək masanız yerləşdiyi otağın ölçüsünə uyğun olmalıdır. Stulları da nəzərə alaraq hər tərəfdən ən azı 1 metr hərəkət sahəsi buraxmaq rahatlıq üçün zəruridir. Unutmayın ki, çox böyük və ya qaranlıq rəngli masalar otaqda daha böyük və ağır görünə bilər, bu da məkanın balansını poza bilər.
Masanın forması və ehtiyaclarınız
Ən geniş yayılmış masa forması düzbucaqlıdır. Bu forma müxtəlif ölçü və uzadıla bilən modellərlə geniş seçim imkanı verir. Yuvarlaq və oval masalar isə daha çox hərəkət sahəsi təmin edir və dar otaqlar üçün uyğundur. Həmçinin, bu formalar qonaqların bir-birini daha yaxşı görməsinə şərait yaradır.
Masa ayaqları – Diqqət edilməli detal
Masa ayaqları masaya neçə nəfərin oturacağını və rahatlığını müəyyən edir. Bəzi masalarda alt dəstəklər oturma sahəsini məhdudlaşdıra bilər. Xüsusilə yuvarlaq və oval masalarda ayaqların yerləşməsinə diqqət edin ki, oturacaq sahəsi daralmış olmasın.
Material seçimi – Keyfiyyət və stil
Yemək masası üçün müxtəlif materiallar mövcuddur və seçim edərkən qiymət, baxım asanlığı və şəxsi zövqünüzü balanslaşdırmaq lazımdır:
Taxta: Klassik və dayanıqlı materialdır.
Taxta görüntülü: Əsl taxtaya nisbətən daha ucuzdur.
Daş: Mərmər, kvars və s. kimi materiallardan hazırlanan masalar möhkəmdir, amma ləkə tutma ehtimalı və ağır olmaları diqqətə alınmalıdır.
Şüşə: Şəffaf, buzlu və rəngli variantları var, məkanı vizual olaraq geniş göstərir. Amma asan qırılır və barmaq izləri görünür.
Metal: Paslanmaz polad və boyalı versiyaları mövcuddur. Yüngül ola bilər, amma barmaq izlərini asan göstərir və təmiri çətin ola bilər.
Plastik və laminat: Əlverişli və asan təmizlənir, lakin keyfiyyət baxımından digər materiallardan geri qala bilər.
Qeyd: Yemək masanızı seçərkən həm estetik, həm funksional, həm də uzunmüddətli istifadəyə uyğun olmasına diqqət yetirin. Doğru seçim məkanda həm rahatlıq, həm də gözəllik yaradır.
Əminə Bayramova
