Ursula fon der Lyayen Trampla Rusiyaya qarşı sanksiyaları müzakirə edib...
Poliqon xəbər verir ki, Avropa Komissiyasının rəhbəri Ursula fon der Lyayen ABŞ prezidenti Donald Tramp ilə telefon danışığı aparıb. Söhbət zamanı tərəflər Rusiyaya qarşı sanksiya təzyiqinin gücləndirilməsi istiqamətində birgə addımlar müzakirə ediblər. Fon der Lyayen sosial şəbəkə X-də yazıb ki, Trampla “yaxşı bir danışıq” olub.
Avropa Komissiyasının rəhbəri bildirib ki, yaxın günlərdə 19-cu sanksiyalar paketi təqdim ediləcək. Yeni məhdudiyyətlərin əsas hədəfləri kriptovalyutalar, bank sektoru və enerji sahəsi olacaq. Bundan əlavə, Komissiya Rusiyadan idxal olunan bütün növ fosil yanacaqlardan daha sürətli imtina etməyi təklif edəcək.
Qeyd edək ki, sözügedən paket əvvəllər müzakirəyə çıxarılsa da, qəbulunun vaxtı təxirə salınmışdı. Bloomberg agentliyinin məlumatına görə, gecikmənin əsas səbəbi ABŞ və Aİ-nin Slovakiya və Macarıstana təzyiqləri olub. Brüssel və Vaşinqton həmin ölkələrin Rusiya neftindən asılılığını azaltmaq üçün intensiv diplomatik danışıqlar aparıblar.
Yeni sanksiya paketinin Avropa İttifaqının ümumi enerji siyasətinə, bank sektoruna və qlobal kriptovalyuta bazarına ciddi təsir göstərəcəyi gözlənilir.
Poliqon.info
