Dələduzluq etməkdə təqsirləndirilən Gədəbəy Rayon İcra Hakimiyyəti başçısının sabiq müavini V.A. və tanışı T.B. barəsində cinayət işi üzrə məhkəmə prosesi keçirilib.
Oxu.az-ın məlumatına görə, Bakı Ağır Cinayətlər Məhkəməsində hakim Aygün Qurbanovanın sədrliyi ilə keçirilən iclasda sənədlərin tədqiqi mərhələsində prosesə çağırıldıqları halda iştirak etməyən şahidlər barəsində məcburi gətirilmə qərarı çıxarılıb.
Oktyabrın 20-də keçirilməsi nəzərdə tutulan növbəti iclasda ifadəsi alınmayan şahidlərin iştirakı gözlənilir.
Qeyd edək ki, cinayət işi üzrə zərərçəkən kimi Gədəbəy rayon sakini C.M. tanınıb. İttihama görə, təqsirləndirilən şəxslər C.M.-ni Gədəbəy Rayon Təhsil Şöbəsinin müdiri vəzifəsinə təyin ediləcəyi ilə aldadaraq 51 min manat pulunu alıblar. Məlumata görə, T.B. bir müddət əvvəl başqa dələduzluq əməlinə görə məhkum olunub. Eks-müavin isə həbsdə deyil və istintaq dövründə onun barəsində polisin nəzarəti altına vermə qətimkan tədbiri seçilib.
Onların hər ikisinə qarşı Cinayət Məcəlləsinin 178.3.2-ci maddəsi (dələduzluq - külli miqdarda ziyan vurmaqla törədildikdə) ilə ittiham irəli sürülüb.
