Hurriyyet.az xəbər verir ki, Ermənistanın Baş naziri Nikol Paşinyan sentyabrın 15-də keçirilən "Hərtərəfli təhlükəsizlik və dayanıqlılıq-2025" adlı beynəlxalq konfransdakı çıxışında Azərbaycan Respublikasının ərazi bütövlüyünü tanımasının səbəbini bəyan edib. Onun sözlərinə görə, Azərbaycanın ərazi bütövlüyünün tanınması Ermənistanın ərazi bütövlüyünün təsdiqlənməsi üçün zəruridir.
Paşinyan başqa yolunun olmadığını qeyd edərək deyib: "Mən Ermənistanın ərazi bütövlüyünü tanımaq üçün Azərbaycanın ərazi bütövlüyünü tanıdım".
O qeyd edib ki, avqustun 8-də Vaşinqtonda əldə edilən sülh sazişi Ermənistanın təhlükəsizliyinin legitimliyini xeyli gücləndirib. "Bu sənəd kifayət qədər qiymətləndirilmir. Bu, Ermənistan və Azərbaycan arasında hər iki ölkə tərəfindən ratifikasiya edilmiş və hüquqi qüvvəyə malik ilk ikitərəfli beynəlxalq sənəddir", - deyə Baş nazir əlavə edib.
Paşinyanın sözlərinə görə, Ermənistan hakimiyyətinin beynəlxalq aləmdə hərəkətləri müstəsna olaraq ölkənin təhlükəsizliyinin legitimliyinin təmin edilməsi strategiyası ilə müəyyən edilir.
Paşinyan deyib: "Birincisi, ərazi bütövlüyümüzün nə olduğunu müəyyən etməli idik və biz mübahisəsiz legitimliyə əsaslanmaq qərarına gəldik. Biz Alma-Ata Bəyannaməsinə əsaslandıq və qarşımıza vəzifə qoyduq: Alma-Ata Bəyannaməsi əsasında Azərbaycanın ərazi bütövlüyünü tanımağa hazırıq, çünki özümüz də bu əsasda ərazi bütövlüyümüzü tanımağa hazırıq".
Paşinyan əlavə edib ki, Praqada Azərbaycan ilə Ermənistan Alma-Ata bəyannaməsi əsasında bir-birinin ərazi bütövlüyünü və suverenliyini tanımağa hazır olduqları barədə siyasi razılıq əldə ediblər.
Hürr Tərcüman
