Moskva Ukraynadakı itkiləri kompensasiya etmək üçün -400 sistemləri ilə bağlı Ankaraya müraciət edib...
Ukraynadakı cəbhədə artan itkilərlə üzləşən Rusiya, daha əvvəl Türkiyəyə satdığı S-400 hava hücumundan müdafiə sistemlərini geri qaytarmaq xahişi ilə Ankaraya müraciət edib.
Poliqon xəbər verir ki, bu barədə Ukraynanın “Defense Express” nəşri məlumat yayıb.
Məlumata görə, Ukrayna qüvvələrinin, xüsusən də dronlardan istifadə edərək bir neçə Rusiya batareyasını sıradan çıxarmasından sonra, Rusiya öz S-400 ehtiyatlarını bərpa etməyə çalışır. Bu səbəbdən Moskva daha əvvəl Türkiyəyə satılan sistemləri geri almaq imkanını nəzərdən keçirir.
2017-ci ildə Türkiyə Rusiyadan 2,5 milyard dollara dörd S-400 diviziyası almışdı. Lakin bu sistemlərin tədarükü NATO və ABŞ ilə münasibətlərdə gərginliyə səbəb olmuşdu. Vaşinqton S-400-lərin NATO sistemləri ilə uyğunsuzluğu barədə narahatlığını ifadə etmişdi.
Hazırda, Ukraynadakı vəziyyətin kəskinləşməsi fonunda, Rusiya öz S-400 ehtiyatlarını doldurmaq üçün yollar axtarır və Türkiyədə olan sistemləri geri almaq imkanını araşdırır.
Türkiyə üçün bu təklif sərfəli ola bilər, çünki Rusiya ehtiyatlarını tez bir zamanda bərpa etməkdə maraqlıdır. Lakin razılaşmanın qiyməti və şərtləri ilə bağlı məsələlər hələlik açıq qalır.
Poliqon.info
