UNICEF-in yeni hesabatına görə, qlobal miqyasda piylənmə artıq çəkidən daha çoxdur və məktəbyaşlı uşaqlar və yeniyetmələr arasında xüsusilə yayılıb. BMT-nin uşaq agentliyi öz hesablamalarını 2000-2022-ci illər üzrə dünya ölkələrinin alimləri tərəfindən tərtib edilmiş və ilk dəfə 2017-ci ildə bu "gərginlik nöqtəsinə" yaxın illərdə çatacağını proqnozlaşdıran məlumatlara əsaslandırıb.
UNICEF 2010-cu ildən bəri baş verən tendensiyalar əsasında 2022-ci ildən sonra baş verənləri proqnozlaşdırmaq üçün məlumatlardan istifadə edib. O, Ümumdünya Səhiyyə Təşkilatının meyarlarına əsasən, məktəbyaşlı uşaq və yeniyetmələrin onundan birində və ya təxminən 188 milyonunda piylənmənin olduğunu müəyyən edib ki, bu da onları ömürlük sağlamlıq problemləri, o cümlədən diabet və ürək-damar xəstəlikləri riski altında qoyur.
UNICEF bildirir ki, bu yaş qrupunda piylənmə nisbəti üç dəfədən çox artaraq 2000-ci ildəki 3%-dən 9,4%-ə çatıb. Hesabatda bu, 5-19 yaşlı uşaqlar arasında çəkisi az olan uşaqların sayının 2000-ci ildəki 13%-dən 9,2%-ə qədər azalması ilə müqayisə edilir.
UNİCEF rəsmisi Ketrin Rusel əlavə edib ki, indi piylənmə dünyanın Saharadan cənub-şərqi Afrika və Cənubi Asiyadan başqa bütün regionlarında çəki çatışmazlığını üstələyir. Hesabatda deyilir ki, qlobal miqyasda ən çox təsirlənən Niue və Kuk adaları kimi bəzi Sakit Okean adalarında 5-19 yaşlı gənclərin təxminən 40%-də piylənmə var. Birləşmiş Ərəb Əmirlikləri və ABŞ-da göstəricilər 21% səviyyəsindədir. Bəzi ölkələrdə, məsələn, ABŞ-da, həkimlər artıq yeniyetmələr üçün bu yaxınlarda hazırlanmış arıqlama dərmanlarından istifadə edirlər. UNICEF bildirib ki, şəkər, duz və yağda yüksək dərəcədə emal edilmiş qidaların və qeyri-sağlam məhsulların demək olar ki, hər yerdə marketinqi piylənmənin artmasında əsas amildir.
"Piylənmə valideynlərin və ya uşaqların uğursuzluğu deyil. Bu, zəhərli qida mühitinin nəticəsidir", - London Universitet Kollecinin qlobal sağlamlıq professoru, UNICEF-in dəstəkçisi və "Ultra-işlənmiş insanlar" kitabının müəllifi Kris Van Tulleken bildirib.
UNICEF-in 170 ölkədən 13-24 yaşlı 64 min gənc arasında keçirdiyi sorğuda respondentlərin 75%-i son bir həftədə şəkərli içkilər, qəlyanaltılar və ya fəstfud reklamları gördüyünü bildirib.
UNICEF bildirib ki, məktəblərdə marketinq məhdudiyyətləri və zərərli qidalara qadağalar daxil olmaqla, dünya miqyasında hökumətlər səviyyəsində mütləq təcili tədbirlər görülməlidir.
Nubar Süleymanova, “İki sahil”
