Çin Elmlər Akademiyasının tədqiqatçıları dünyanın ilk böyük dil modeli olan, insan beyninin iş prinsiplərini təqlid edən süni intellekti təqdim ediblər. Yeni sistem "SpikingBrain1.0" adlanır və ənənəvi modellərlə müqayisədə xeyli az enerji sərf edir, həmçinin Nvidia çiplərinə ehtiyac duymadan fəaliyyət göstərir.
Ölkə.az xəbər verir ki, bu barədə "The Independent" məlumat yayıb.
"SpikingBrain1.0" beynin iş prinsipinə uyğun olaraq yalnız konkret tapşırığı yerinə yetirmək üçün lazım olan neyron hüceyrələri aktivləşdirir. Bu yanaşma sistemi həm daha sürətli, həm də enerji baxımından səmərəli edir. Alimlərin sözlərinə görə, yeni model mövcud süni intellekt platformalarından 25–100 dəfə daha sürətli işləyə bilir.
Müasir geniş istifadə olunan süni intellekt sistemləri, o cümlədən ChatGPT və "Llama", böyük həcmdə məlumat və hesablama gücü tələb edir, həmçinin əsasən Nvidia qrafik prosessorları üzərində qurulur. Bu isə yüksək xərclərə, böyük enerji sərfiyyatına və inkişaf imkanlarının məhdudlaşmasına gətirib çıxarır. "SpikingBrain1.0" isə mətnləri bütöv şəkildə deyil, yaxın kontekstə diqqət yönəltməklə emal edir ki, bu da insan beyninin təbii fəaliyyətinə daha çox oxşayır.
Yeni süni intellekt sistemi Çində hazırlanmış "MetaX" adlı çip platformasında işləyir. Bu texnologiya ABŞ-ın Çinə tətbiq etdiyi ixrac məhdudiyyətləri fonunda ölkənin öz süni intellekt ekosistemini formalaşdırmaq səylərinin bir hissəsi kimi qiymətləndirilir.
Araşdırmanın nəticələri "arXiv" elmi platformasında dərc olunub və hazırda rəyçi qiymətləndirməsini gözləyir.(valyuta.az)
