Fransa prezidenti: Dövlətlər həm dənizdə, həm də havada təhlükəsizliyin təmin olunması üçün öhdəlik götürməyə razılıq veriblər...
Poliqon xəbər verir ki, Fransa prezidenti Emmanuel Makron Ukrayna ilə bağlı keçirilən görüşdən sonra təşkil olunan brifinqdə mühüm açıqlama verib. Fransa prezidentinin sözlərinə görə, 26 dövlət ya Ukraynaya birbaşa qoşun göndərməyə, ya da bu koalisiyanın fəaliyyətini dəstəkləmək üçün maliyyə vəsaiti ayırmağa razılıq bildirib.
Makron qeyd edib ki, bu dəstək yalnız quru əməliyyatları ilə məhdudlaşmır. O, həmçinin dənizdə və havada təhlükəsizliyin təmin edilməsinin vacibliyinə diqqət çəkib. Fransa lideri vurğulayıb ki, məqsəd Ukraynanın müdafiə qabiliyyətini gücləndirmək və regionda təhlükəsizliyi möhkəmləndirməkdir.
Fransa prezidenti əlavə edib ki, hazırda üzərində işlənən mexanizmlər koalisiyaya qoşulmuş ölkələrin imkan və resurslarından asılı olaraq dəyişəcək. Bəzi dövlətlər birbaşa hərbi iştirakla, digərləri isə maddi-texniki təminatla prosesə qatılacaq.
Analitiklərin fikrincə, bu açıqlama Ukraynaya dəstəyin yeni mərhələyə keçdiyini göstərir. Ekspertlər bildirirlər ki, Avropa ölkələrinin və müttəfiqlərin belə bir addımı Rusiya ilə Qərb arasında qarşıdurmanı daha da kəskinləşdirə bilər.
Poliqon.info
