“Rusiyanın əlində belə materiallar olsaydı, çoxdan istifadə edər və Trampı ABŞ prezidenti kimi tam zərərsiz hala gətirərdi...”
Bildiyiniz kimi, dünən Portuqaliya prezidenti Marselo Rebelo de Souza ABŞ lideri Trampı özünü “ Sovet və ya Rusiya agenti” kimi aparmaqda ittiham etdi. Belə ittihamlar hələ hazırkı ABŞ liderinin ilk prezident dövründən bəri səsləndirilir. Keçmiş KQB əməkdaşı Yuri Şvets, Qazaxıstanın keçmiş MTN rəhbəri, Ukraynanın Milli Qəhrəmanı olan ölkənin xüsusi xdimət orqanlarının tanınmış generallarından biri və s. Trampın 35-40 il öncələrdən SSRİ “KQB” tərəfindən ələ alınması haqda ciddi faktlar səsləndirirlər. Görəsən, bu ittihamların sonu haraya aparır?
Mövzu ilə bağlı Moderator.az-a açıqlamasında siyasi şərhçi Əli Orucov bunları söyləyib:
“Trampın Rusiyanın agenti olması barədə fikirlər ilk dəfə deyil ki, səsləndirilir. Ancaq indiyədək bunu təsdiq edən heç bir dəlil, heç bir fakt və sübut ortaya qoyulmub. Ona görə də bu ittihamlar havada qalır. Ağ Ev rəhbərinin nə vaxtsa hansısa ölkənin agenti olması inandırıcı da deyil. Bu cür ittihamlar sadəcə Trampın Rusiya və onun prezidenti Putinlə bağlı fərqli baxışlarından irəli gəlır.
Qərbin əksər siyasi liderləri və Birləşmiş Ştatların sabiq prezidenti Cozef Bayden daha sərt mövqeyə malik olsalar da, Putinə inamsızlıq göstərsələr də, Tramp belə deyi. O, Ukrayna-Rusiya müharibəsini durdurmağı diplomatik, danışıqlar və güzəştlər yolu ilə çözülməsinə üstünlük verir. Onun bununla bağlı yürütdüyü siyasətin sistemsizliyi, qərarsızlığı və tərəddüdləri də məhz bununla izah edilməlidr. Tram biznesmendir, ona görə də daha çox iqtisadi və ticari faydaları önə çəkir və anlayır ki, Rusiyanın böyük potensialı var. O, hesab edir ki, Moskva ilə əlverişli sövdələşməyə nail olmaq Birləşmiş Ştatlara milyardlar qazandırar, eyni zamanda öz beynəlxalq imicini gücləndirərək, mövqeyini bərkidərdi...
Tramp Nobel Sülh Mükfatını almaq niyyətini də gizlətmir. O, tarixdə həm də sülhpərvər, sülhün qoruyucusu kimi qalmaq istəyir. Bu məsədlərinə çatmaq üçün Ukrayna-Rusiya müharibəsində kiçik də olsa hansısa nəticəyə nail olmaq Trampa çox lazımdır. Rusiya və Putinə mülayim mövqeyinə görə onu Rusiyanın agenti adlandırmaq, əlbəttə doğru və ədalətli yanaşma deyil. Rusiyanın əlində belə materiallar olsaydı, çoxdan istifadə edər və Trampı ABŞ prezidenti kimi tam zərərsiz hala gətirərdi. Və o da maraqlıdır ki, ABŞ prezidenti haqqında öz ölkəsində ona qarşı müxtəlif ittihamlar səsləndirilib, məhkəmə prosesləri keçirilib, hamısında da Tramp qalib olub...”
Sultan Laçın
