İsrailin xarici işlər naziri Gideon Saar Fələstin dövlətinin mövcudluğu ideyasını rədd edib. Saar Vaşinqtonda ABŞ dövlət katibi Marko Rubio ilə görüşündən sonra keçirdiyi mətbuat konfransında Fələstin dövləti ilə bağlı planın nədən ibarət olduğu ilə bağlı suala "o dövlət mövcud olmayacaq" cavabını verib.
Redaktor.az-a açıqlamasında politoloq Turab Rzayev bildirdi ki, belə bir gedişatın olacağı əvvəlcədən bəlli idi.
"Netanyahu uzun müddətdir Fələstin dövlətinin mövcudluğunu tanımır və dolayı yollarla da bunu açıq şəkildə bildirirdi. Bəzən Fələstini İordaniya adlandırır, bəzən də fələstinlilərin köçürülməsindən danışırdı. Xüsusilə onun müttəfiqləri olan sağ partiyalar ümumiyyətlə fələstinlilərin İsrail ərazisindən və öz torpaqlarından qovulmasını, dövlətin tamamilə ləğvini tələb edirdilər. Netanyahunun son addımları da bu siyasətin davam etdiriləcəyini göstərir. Qəzza zolağından əhalinin köçürülməsi, orada insanların qalmaması və həmin ərazilərdə yeni yaşayış məntəqələrinin salınması planlaşdırılır. Hazırda 1 milyona yaxın insanın yaşadığı İordaniyanın qərb sahillərində yeni yaşayış məntəqələri inşa olunur və onların genişləndirilməsi davam edir. İsrail eyni zamanda bu ərazini ilhaq edəcəyini açıqlayıb. Faktiki olaraq Fələstin torpaqları ilhaq edilərsə, müstəqilliyi tanınmayacaq. Bununla bağlı İsrail tərəfdən ABŞ-nin dəstəyinə ümid edilir və Vaşinqtonun mövqeyi gözlənilir".
Politoloq qeyd etdi ki, bir çox məsələlərdə ABŞ Prezidenti Donald Tramp İsraillə eyni mövqedən çıxış edib amma bu məsələdə Tramp səssiz qalıb.
"Məsələn, paytaxtın Qüdsə köçürülməsi Trampın razılaşdığı məsələlərdəndir. Lakin Fələstinin tamamilə ləğvi Tramp üçün daha mürəkkəb məsələdir. Çünki bu addım ABŞ-də demokratların, insan haqları müdafiəçilərinin, Avropa İttifaqının bəzi üzvlərinin, beynəlxalq ictimaiyyətin, eləcə də Fələstini dəstəkləyən Rusiya, Çin, İran və ərəb ölkələrinin ciddi etirazına səbəb ola bilər. Belə bir vəziyyət böyük ajiotaj yarada bilər. Hazırda İsrail hökuməti və Netanyahu administrasiyası ağır tənqidlərə məruz qalır və ciddi təzyiq altındadır. Fələstin dövlətinin ləğvi məsələsi isə gündəmdə daha çox yer almağa başlayır. Fələstin məsələsi həm Netanyahunun seçicilərinə, həm də ultra-sağ, radikal siyasi tərəfdaşlarına verdiyi vəddir. Digər tərəfdən, Netanyahu öz siyasi hakimiyyətini uzatmaq məqsədilə də bu addımları atır. Çünki hakimiyyətdən uzaqlaşdırılacağı halda onun barəsində cinayət işinin açılması ehtimalı var. Məhz bu səbəbdən Netanyahu bu istiqamətdə qətiyyətli addımlar atır", - deyə müsahibimiz yekunlaşdırdı.
Xədicə BAXIŞLI
