“PAŞA Holding” və Türkiyə-Azərbaycan İş Adamları və Sənayeçiləri İctimai Birliyi (TÜİB) strateji əməkdaşlıq çərçivəsində yeni layihələri müzakirə ediblər.
Finss.az xəbər verir ki, TÜİB İdarə Heyətinin üzvləri “PAŞA Holding”i ziyarət edərək Azərbaycan-Türkiyə iqtisadi əməkdaşlığı, birgə layihələri və bu il keçiriləcək II Azərbaycan-Türkiyə İnvestisiya Forumunun əhəmiyyətini müzakirə ediblər. Forumun ilk dəfə keçirilməsinin uğurlu nəticələri yüksək qiymətləndirilib.
“PAŞA Holding”in Direktorlar Şurasının sədr müavini Mir Camal Paşayev qonaqları salamlayaraq strateji tərəfdaşlıq çərçivəsində dövlət və özəl sektorun birgə fəaliyyətinin əhəmiyyətini vurğulayıb. O bildirib ki, “özəl-dövlət dialoqu” iqtisadi inkişafın və dayanıqlı əməkdaşlığın əsas dayaqlarından biridir. Paşayev həmçinin insan resurslarının gücləndirilməsi, texnologiya və təhsil layihələrinin iki ölkə arasında əməkdaşlığın prioritet istiqamətləri olduğunu qeyd edib.
TÜİB İdarə Heyətinin sədri Hüseyin Büyükfırat qurumun indiyədək həyata keçirdiyi layihələr barədə məlumat verərək Azərbaycan-Türkiyə iqtisadi əməkdaşlığının strateji əhəmiyyətini vurğulayıb. Savaş Uzan isə aqrar sahədə ixtisaslı kadrların hazırlanmasının vacibliyini qeyd edib və peşə məktəblərinin bu istiqamətdə rolunun artırılmasının önəmini diqqətə çatdırıb.
Natavan Məmmədova TÜİB-in “Körpü” layihəsini təqdim edərək sahibkarların inteqrasiyasına dəstək imkanlarını açıqlayıb, Günay Ağayeva logistika sahəsində mövcud problemlərin həlli yolları ilə bağlı təkliflərini bölüşüb, Necmeddin Taşbağ isə təşkilatın fəaliyyət sahəsinin genişləndirilməsi və özəl sektorun daha fəal iştirakının vacibliyini vurğulayıb.
Toplantının sonunda tərəflər Azərbaycan və Türkiyə arasında həyata keçirilən və nəzərdə tutulan bütün strateji təşəbbüslərə dəstək verməyə hazır olduqlarını bildiriblər.
