Rəsmi Tehran layihəni beynəlxalq nəqliyyat dəhlizlərinin strateji hissəsi kimi təqdim edir...
Poliqon xəbər verir ki, İranın icraçı vitse-prezidenti Məhəmməd Cəfər Kaem Panah hökumətin Çabahar dəmir yolu layihəsini sürətləndirmək və onu ölkənin dəmir yolu şəbəkəsinə birləşdirmək istiqamətində fəal işlədiyini açıqlayıb.
Onun sözlərinə görə, bu dəmir yolu qısa müddətdə beynəlxalq nəqliyyat dəhlizlərinə qoşulacaq və region üçün strateji əhəmiyyət daşıyacaq. Kaem Panah Çabaharda “Şimal–Cənub” dəhlizinə səfəri zamanı İRNA agentliyinə verdiyi açıqlamada bildirib ki, Çabahar xəttinin milli dəmir yolu şəbəkəsinə inteqrasiyası yeni beynəlxalq nəqliyyat arteriyasının formalaşmasına zəmin yaradacaq.
Rəsmi əlavə edib ki, bu dəhliz vasitəsilə Çabahar limanından yüklər əvvəlcə İranın şimalına, daha sonra isə Qafqaza, Rusiyaya və Avropaya daşına biləcək. Bu isə ölkənin regional və qlobal ticarətdə rolunu gücləndirəcək.
Çabahar dəmir yolu İran üçün strateji logistika layihələrindən biri hesab olunur. Əsas məqsəd Hind okeanına birbaşa çıxışı olan Çabahar limanını İranın daxili şəbəkəsinə bağlamaqdır. Bu yol həm “Şimal–Cənub” beynəlxalq dəhlizinin, həm də “Şərq–Qərb” marşrutlarının tərkib hissəsinə çevrilə bilər.
Layihənin reallaşması Hindistan, Rusiya və digər region ölkələri üçün də yeni imkanlar açır. Belə ki, Hindistan Çabahar limanına böyük investisiya yatırıb və bu marşrut vasitəsilə Orta Asiya və Qafqaz bazarlarına çıxışı genişləndirməyi planlaşdırır. Rusiya üçün isə İran üzərindən açılacaq bu yol Qara dəniz və Baltik istiqamətlərinə alternativ kimi əhəmiyyət daşıyacaq.
Ekspertlərin fikrincə, Çabahar dəmir yolunun istifadəyə verilməsi İranın tranzit ölkə rolunu gücləndirməklə yanaşı, region ölkələrinin ticarət marşrutlarının şaxələndirilməsinə də ciddi töhfə verəcək.
Poliqon.info
