“LizaAlert” axtarış-xilasetmə qrupunun eksperti Yevgeni Slizovski Bosfor boğazında itkin düşən rusiyalı üzgüçü Nikolay Sveçnikovun xilas olunma ehtimalını dəyərləndirib.
Redaktor.az xəbər verir ki, o, TASS-a açıqlamasında şansların “son dərəcə aşağı” olduğunu bildirib.
Slizovskinin sözlərinə görə, axtarış əməliyyatına gec başlanması idmançının sağ tapılması imkanlarını minimuma endirib:
“Onlar nə qədər gec başlasalar, canlı insan tapmaq ehtimalı bir o qədər azalır. Təəssüf ki, hazırda yeganə ehtimal üzgüçünün ölməsidir. Şanslar çox azdır”, - deyə ekspert qeyd edib.
Mütəxəssis bildirib ki, təcrübəli idmançının ölümünə müxtəlif amillər səbəb ola bilər. Onların arasında digər üzgüçü ilə toqquşma nəticəsində baş zədəsi almaq və ya fiziki gücünün həddindən artıq qiymətləndirilməsi ehtimalları göstərilir.
Hadisə ilə bağlı axtarış işləri davam etdirilir.
Aytəkin TOFİQQIZI
