Kanadanın Federal Apellyasiya Məhkəməsi Britaniya Kolumbiyasındakı fermada 400 dəvəquşunun məhv edilməsi qərarını təsdiqləyib.
Azreform.info xəbər verir ki, bu barədə "The Boston Globe" məlumat yayıb.
Qərarın əsas səbəbi quş qripi təhlükəsidir. Hadisə 36 gün ərzində "Universal Ostrich Farms" fermasında 69 dəvəquşunun ölümü ilə başlayıb ki, bu da müəssisədəki heyvanların təxminən 15%-i deməkdir. İki ölmüş quşun laboratoriya analizləri yüksək patogen quş qripi ştamının mövcudluğunu təsdiqləyib.
Kanada Qida Təhlükəsizliyi Agentliyi diaqnoz təsdiqləndikdən sonra qalan heyvanların tam məhv edilməsini əmr edib. Ferma sahibləri məhkəmə yolu ilə quşları xilas etməyə çalışsalar da, apellyasiya məhkəməsi tənzimləyicinin qərarını dəstəkləyib.
"Federal Apellyasiya Məhkəməsi keçənilki qərarı qüvvədə saxlayıb və "Universal Ostrich Farms"ın iddiasını rədd edib", - deyə məlumatda bildirilib.
Qeyd olunub ki, tədbir təhlükəli xəstəliyin yayılmasının qarşısını almaq və digər kənd təsərrüfatı müəssisələrini qorumaq məqsədini daşıyır. Ferma sahibləri məhkəmənin qərarından dərin məyusluqlarını ifadə edərək, heyvanları xilas etmək üçün bütün mümkün vasitələrin tükəndiyini vurğulayıblar.(oxu.az)
