Finlandiya prezidenti Alexandr Stubb Ukraynada müharibə davam edərkən Finlandiyanın Moskva ilə əlaqələri bərpa etməsi ideyasını rədd edib.
"Yle"də danışan Stubb Avropanın Rusiyanı təcrid etməkdə haqlı olduğunu, ancaq ABŞ prezidenti Donald Trampın Vladimir Putini danışıqlar masasına oturtmağa məcbur edə biləcəyini vurğulayıb. O, ötən həftə Alyaskada Tramp və Putinin görüşü ilə başlayan Moskvanın Vaşinqtonla təmaslarını taktiki manevr kimi qiymətləndirib.
"Həmin görüş Putinin Moskvanı növbəti görüş üçün yer kimi təklif etməsi ilə başa çatdı. Lakin Rusiya paytaxtı Vladimir Zelenskinin iştirakı ilə danışıqlar üçün doğru yer olmayacaq, baxmayaraq ki, orada Putin və Tramp arasında görüş mümkündür. Ankara görüşü Rusiyanın təcridinə son qoydu" - deyə Stubb bildirib.
O qeyd edib ki, Avropa Moskvanı təcrid etməkdə haqlıdır, lakin yalnız Tramp Rusiyanı sülhə məcbur edə bilər.
“Əgər Putin Avropa liderlərinə məhəl qoymamaq qərarına gəlsə, bizim edə biləcəyimiz heç bir şey yoxdur" - deyə Finlandiya lideri əlavə edib.
Stubb Trampın Putinlə danışıqlarının pis olduğunu düşünmədiyini deyib. O, ABŞ-ın Hindistan vasitəsilə tətbiq etdiyi dolayı sanksiyaların Rusiya prezidentini danışıqlar masasına oturtmasına kömək etdiyini qeyd edib.
“Biz sadəcə Trampın Putinə qarşı səbrini itirməsini gözləyirik”, - deyə Stubb əlavə edib.
