Lindsi Qrem Moskvanı Ukrayna uşaqlarının “qaçırılması”nda ittiham edir...
Poliqon xəbər verir ki, ABŞ senatoru Lindsi Qrem (Rusiya tərəfindən terrorçular və ekstremistlər siyahısına salınıb) Rusiyaya qarşı yeni təşəbbüslə çıxış edib. O, əgər Moskva Ukraynadan “qaçırıldığı” iddia edilən uşaqları geri qaytarmasa, Senata Rusiyanın “terrorizm sponsoru dövlət” kimi tanınması barədə qanun layihəsi təqdim edəcəyini bildirib.
Senatorun sözlərinə görə, söhbət “19 mindən çox uşağın barbarcasına qaçırılmasından” gedir. Qrem qeyd edib ki, belə bir status Rusiyanın digər dövlətlərlə ticarətini və iqtisadi əlaqələrini ciddi şəkildə çətinləşdirəcək.
Xatırladaq ki, ABŞ prezidenti Donald Tramp Alyaskada keçirilən sammit zamanı Rusiya lideri Vladimir Putinə ABŞ-ın birinci xanımı Melaniya Trampın məktubunu təqdim etmişdi. Məktubda məhz Ukrayna uşaqlarının taleyi məsələsi gündəmə gətirilmişdi.
Rusiya XİN-in rəsmi nümayəndəsi Mariya Zaxarova isə məsələ ilə bağlı açıqlamasında bu iddiaları əsassız adlandırıb. Onun sözlərinə görə, Ukrayna tərəfindən təqdim edilən siyahılarda adı çəkilən uşaqların əksəriyyəti heç vaxt Rusiyada olmayıb, bəziləri isə artıq yetkinlik yaşına çatıb və ya ailələrinə qayıdıb.
Poliqon.info
