Hurriyyet.az xəbər verir ki, Ermənistanın Baş naziri Nikol Paşinyan amerikalıların Zəngəzur dəhlizinə nəzarət etməyəcəklərini bəyan edib. Paşinyan jurnalistlərə açıqlamasında bildirib ki, Ermənistan-ABŞ birgə şirkəti dəhlizə nəzarət etməyəcək, onu idarə edəcək, yəni biznes idarəsi işləri ilə məşğul olacaq.
Paşinyan deyib ki, tez-tez suallar yaranır: yol nə vaxt çəkiləcək və İran yük maşınları oradan keçə biləcəkmi? Nümunə kimi o, Ermənistanda Rusiya tərəfinin konsessiya müqaviləsi əsasında idarə etdiyi mövcud dəmir yolunu göstərib. Ərazi Ermənistanın yurisdiksiyasında qaldığından istənilən ölkənin yük maşınları ondan sərbəst istifadə edir.
Paşinyanın sözlərinə görə, Ermənistan heç vaxt Azərbaycanın əsas hissəsinin Naxçıvanla birləşdirilməsinə maneələr yaratmağa hazırlaşdığını deməyib. Vaşinqton bəyannaməsində qeyd olunan beş prinsip çərçivəsində həm bu üstünlük, həm də ölkədaxili və beynəlxalq daşımalarda Ermənistan üçün üstünlüklər vurğulanır.
Hürr Tərcüman
