Amerikalı geofizik Tom Parsons Mərmərə dənizindəki qırılmaların vəziyyətini qiymətləndirərkən, fay xətləri boyunca fəaliyyəti “yavaş-yavaş açılan qapıya” bənzədib və bunun nasazlıqlardakı gərginliyi tədricən aradan qaldıra biləcəyini söyləyib.
Hafta.az-ın yazdığına görə, Parsons ötənilki proqnozunu xatırladaraq, 2046-cı ilə qədər Mərmərə dənizində 7,2 bal gücündə zəlzələ ehtimalının 47 faiz səviyyəsində qaldığını bildirib. O, aprelin 23-də Silivri sahillərində baş verən 6,2 bal gücündə zəlzələdən sonra aparılan stress analizlərinə də toxunaraq, “Mərkəzi Mərmərə dənizində gərginliyin artdığını görürük. Ancaq bu, ehtimal hesablamalarımızı dəyişdirmək üçün kifayət qədər əhəmiyyətli bir siqnal deyil” deyib.
Parsons, zəlzələlərin zaman və böyüklük baxımından proqnozlaşdırıla bilməyəcəyini vurğulayaraq, ehtiyat tədbirləri ilə can itkisinin minimuma endirilə biləcəyini qeyd edib: “Biz zəlzələnin miqyasını dəyişə bilmərik. Lakin insan itkisini və dağıntıları minimuma endirə bilərik. Bu, yalnız düzgün planlaşdırma, monitorinq və icra ilə mümkündür. Seysmik rayonlaşdırma və sınaqdan keçirilmiş ərazilərdə tikintiyə icazələrin verilməsi kimi tədbirlər hökumətin siyasətinin əsasını təşkil etməlidir”.
