18 avqustda Azərbaycan Respublikası Dövlət Sərhəd Qoşunlarının yaranmasının ildönümü qeyd olunur.
Hurriyyet.az xəbər verir ki, Azərbaycan sərhəd mühafizəsinin əsası hələ 1919-cu ildə Azərbaycan Xalq Cümhuriyyəti dövründə qoyulub.
Həmin il Cümhuriyyət hökumətinin qərarı ilə xüsusi sərhəd xidməti təşkil edilib və ölkənin dövlət sərhədlərinin qorunmasına başlanılıb. Sovet dövründə sərhəd təhlükəsizliyi SSRİ-nin tərkibində fəaliyyət göstərsə də, müstəqilliyin bərpasından sonra – 1992-ci ilin 18 avqust tarixində Azərbaycan Respublikası Dövlət Sərhəd Xidməti təsis olunub.
Hazırda Dövlət Sərhəd Xidməti yalnız sərhədlərin mühafizəsi ilə deyil, həm də qaçaqmalçılıqla mübarizə, qanunsuz miqrasiya və digər transmilli təhdidlərin qarşısının alınması istiqamətində mühüm vəzifələr həyata keçirir.
Dövlət Sərhəd Qoşunları ölkənin suverenliyi və ərazi bütövlüyünün qorunmasında böyük rol oynayır. Xüsusilə, 44 günlük Vətən müharibəsi dövründə və sonrakı əməliyyatlarda sərhədçilər qəhrəmanlıq göstərərək işğaldan azad olunmuş ərazilərdə dövlət sərhədinin bərpasında fəal iştirak ediblər.
