UEFA Çempionlar Liqasının 3-cü təsnifat mərhələsinin ilk oyunları çərçivəsində "Şkendiya"nın qonağı olan "Qarabağ" Azərbaycana 1:0 hesablı qələbə ilə qayıtdı. Tanınmış futbol mütəxəssisi, Azərbaycan millisinin sabiq yarımmüdafiəçisi Aslan Kərimovla əlaqə saxlayıb Skopyedəki oyunla bağlı fikirlərini bölüşməsini və təmsilçimizin mərhələ adlamaq şanslarını dəyərləndirməsini xahiş etdik.
Onun Fanat.Az-a açıqlaması belə oldu:
"Şkendiya"nın Rumıniya təmsilçisi FCSB-ni mübarizədən kənarlaşdırdıqdan sonra eyforiyaya qapıldığını düşünmürəm. "Qarabağ"da Şimali Makedoniyadan olan bir neçə futbolçu oynayıb. Rəqibin təmsilçimizin oyunlarını izlədiyinə, komandamızı təhlil etdiklərinə əminəm. Elə Azərbaycan çempionunu yaxından tanıyan şimali makedoniyalıların da "Şkendiya"nı məlumatlandırdıqlarını güman edirəm. Yəqin ki, soruşub maraqlanıblar. Hiss olunurdu ki, bizimkilər barədə yaxşı bilgi toplayıblar.
FCSB-yə qarşı da belə oynamışdılar. Sadəcə, Rumıniya komandası ilə matçlarda müəyyən epizodlarda qol vurmağı bacardılar. FCSB-nin müdafiə xətti bir qədər etibarlı deyildi. Bunu Buxarestdə baş tutan ikinci oyunda da gördük. Həmin qarşılaşmada meydan sahibləri hücuma atılarkən "Şkendiya"ya çox sayda boşluqlar verirdi. "Qarabağ" isə bu işin öhdəsindən gəlməyi bacardı. Düzdür, matçın başlanğıcında meydan sahibləri təzyiq etməyə çalışdılar, ancaq onlar da başa düşürdülər ki, açıq futbol sərgiləmək olmaz. Oyun ərzində "Şkendiya"nın hücumları zamanı uzağı 2-3 oyunçu "Qarabağ"ın cərimə meydançasına girirdi ki, bu da başadüşülən idi. Rəqib azlıqda yaxalanmaqdan ehtiyat edir, böyük qüvvə ilə irəli atılmırdı. Rəqibin iki qaradərili oyunçusu diqqətimi çəkdi. Dayaq yarımmüdafiəçisi və Toral Bayramovun üstünə düşən cinah yarımmüdafiəçisi özlərini yaxşı tərəfdən göstərdilər. Hər ikisi sürətli futbolçular idi. Təbii ki, təcrübəli kapitanlarını da vurğulamalıyıq. Bir qədər ləng olsa da, çox texnikalı, yaxşı oyun zəkası olan futbolçudur.
"Qarabağ" Skopyedə dominant futbol oynamağı bacardı. Təmsilçimiz ilk yarım saatda belə demək mümkündürsə, mərkəzi ələ almışdı. Rəqibin topla çox oynamasına imkan vermədilər. Yarımmüdafiə xəttimiz "Şkendiya"nın yarımmüdafiə xəttini üstələyə bilirdi və bunun da sayəsində onların kəsərli həmlələr təşkil etməsinə mane olur, topu ələ keçirən zaman təhlükə yarada bilirdik. "Qarabağ"ın ön xətt oyunçularının yaxşı pressinq tətbiq etdiklərini də qeyd etməliyik. Məsələn, Nəriman Axundzadə birinci hissədə bir neçə epizodda topu rəqibdən aldı və qonaqlar hücum qurdular. Nəriman qol vura bilməsə də, rəqib müdafiəsini təzyiqdə saxladı, komandasına fayda verdi. Təbii, alınmayan tərəflər də oldu. Tutaq ki, sürətli keçidlərdə o qədər də inamlı təsir bağışlamadıq. Meydanın mərkəzində yaxşı pressinq edirdik, lakin top bizdə olanda bəzi oyunçularımızın hələ də bir-birini yaxşı başa düşmədiyi sezilirdi. Özəlliklə Emmanuel Addainin çox qaçmasına, çalışmasına rəğmən, son nöqtəni qoymaq, həlledici ötürməni verməklə bağlı problemləri oldu. Ümumilikdə ilk addımımızı atmışıq, Bakıya 1:0 hesablı qələbə ilə dönmüşük. Bakıdakı matçın da eyni ssenari ilə keçəcəyini güman edirəm. Doğrudur, rəqib öz meydanında daha yaxşı oynayır, amma 0:1 hesabı ilə uduzduqlarına görə, ikinci qarşılaşmada daha çox hücum etməyə məcburdur. Bütün hallarda, "Qarabağ"ın bu mərhələni keçmək şansı həddindən artıq yüksəkdir".
Nihat
