Referans xəbər verir ki, Türkiyə Silahlı Qüvvələrinin tanınmış komandanlarından biri, Azərbaycanda hərbi fəaliyyəti ilə əfsanələşmiş Bəxtiyar
Ersay paşa yüksək rütbəyə layiq görülüb. İndiyədək korgeneral olan Bəxtiyar Ersay paşaya Türkiyə Prezidenti tərəfindən orgeneral rütbəsi verilib.
Türkiyə Silahlı Qüvvələrinin rütbə sistemində “korgeneral” (korpus generalı – Azərbaycan sistemində təxminən general-leytenantə bərabər)
üçulduzlu general rütbəsidir və əsasən ordu və ya korpus komandanı vəzifələrini icra edən hərbçilərə verilir. “Orgeneral” (ordu generalı –
Azərbaycan sistemində general-polkovnikə uyğun gəlir) isə Türkiyə ordusunda ən yüksək generallıq rütbəsidir və yalnız strateji rəhbərlik
səviyyəsində xidmət edən komandanlara təqdim olunur.
Bəxtiyar Ersay paşa uzun illər Türkiyənin cənub-şərqində, İraq və Suriyada PKK terror təşkilatına qarşı aparılan hərbi əməliyyatlarda fərqlənib. O,
terrora qarşı mübarizədə qazandığı təcrübə və peşəkarlığı ilə tanınıb, sonrakı illərdə isə Azərbaycanla hərbi əməkdaşlıq çərçivəsində daha da
tanınan simaya çevrilib.
Xüsusilə 2020-ci ilin payızında baş vermiş 44 günlük Vətən müharibəsi zamanı Bəxtiyar Ersay paşa Türkiyə Silahlı Qüvvələri tərəfindən Azərbaycana
ezam olunaraq, burada hərbi planlamalar, əməliyyatların koordinasiyası və strateji məsləhətlərlə məşğul olub. Onun Azərbaycandakı fəaliyyəti
yalnız hərbi çevrələrdə deyil, ictimaiyyət arasında da yüksək rəğbətlə qarşılanıb. Azərbaycan cəmiyyətində Bəxtiyar paşa qardaş ölkənin sarsılmaz
dəstəyinin simvoluna çevrilib.
Bəxtiyar Ersay paşanın orgeneral rütbəsinə yüksəldilməsi təkcə şəxsi nailiyyət deyil, həm də Türkiyə-Azərbaycan qardaşlığının, hərbi ittifaqının
daha da güclənməsinin simvoludur. Bu təyinat eyni zamanda onu göstərir ki, Qarabağ müharibəsində Azərbaycanla çiyin-çiyinə savaşan
komandirlər təkcə tarixi yox, həm də strateji səviyyədə qiymətləndirilir.(Musavat.com)
