Ara-sıra “təyyarə bileti qiymətinə” Rusiyadan Türkiyəyə “çox qənaətcil son dəqiqə turları” və tur paketləri təklif edilsə də, Türkiyədə “keyfiyyətli tətil variantları” ümumiyyətlə ruslar üçün baha olaraq qalır. Yay mövsümünün ortasında istirahətini planlaşdıran rusiyalı turistlər üçün ən sərfəli istiqamətlər açıqlanıb.
Hafta.az-ın yazdığına görə, ATOR və Sletat.ru ekspertlərinin fikrincə, 2025-ci ilin yayında ən ucuz istirahət istiqamətləri Rusiyanın Qara dəniz sahilləri və separatçı Abxaziya ərazisi olub. İfrat istilərə baxmayaraq Birləşmiş Ərəb Əmirlikləri (BƏƏ) də üçüncü olaraq əhəmiyyətli endirimlər təqdim edib. Rusiya ilə BƏƏ arasında çoxsaylı birbaşa uçuşlar da onların seçimlərinə təsir göstərib.
Tailand, Misir və Türkiyə kimi klassik yay istiqamətləri bu il daha bahalı variantlar arasındadır. Bununla belə, Vyetnam, Çin, Kuba və Maldiv adaları kimi daha uzaq istiqamətlərdə də qiymətlər yüksəkdir. Mütəxəssislərin fikrincə, bu reytinq həmin ölkələrdə ümumi qiymət səviyyəsindən deyil, rusiyalı turistlərin bu istiqamətlərə nə qədər pul xərcləməyə hazır olduğunu əks etdirir.
İyul ayı etibarilə iki nəfər üçün bir həftəlik hər şey daxil paket turun orta qiymətləri aşağıdakı kimi olub:
Abxaziyada 138050 rubl (1644 dollar), Krasnodar və Krımda 141200 rubl (1681 dollar), BƏƏ-də 155400 rubl (1850 dollar), Tailandda 169800 rubl (2021 dollar), Misirdə 179300 rubl (2134 dollar), Vyetnamda 199100 rubl (2370 dollar), Çində 211050 rubl (2513 dollar), Türkiyədə 217600 rubl (2590 dollar).
