İnsanların daimi bir yerdə yaşamaya, ofis masasının arxasında sıxılmaya ehtiyacı varmı? Bəlkə də yox. Son illərdə karavan evlər – yəni təkərləri olan mobil evlər – getdikcə daha çox insanın həyat tərzinə çevrilib. Bəs bu trend haradan gəldi və nəyə görə bu qədər cazibədardır?
Nədir bu karavan?
Karavan – içində yataq, mətbəx, oturma sahəsi və hətta bəzən hamam və tualet olan, avtomobillə çəkilə bilən və ya mühərrikli şəkildə hərəkət edən mobil evdir. Karavanlar əsasən iki cür olur:
Çəkilən karavanlar (treylerlər) – maşına qoşularaq daşınır.
Motorlu karavanlar (motokaravan) – özü hərəkət edə bilən ev tipli avtomobillərdir.
Bu evlər insanlara həm rahatlıq, həm də azadlıq verir – çünki istədiyin vaxt yola çıxıb, dağda, dəniz kənarında, meşədə… harada istəsən, orada “evdəymiş kimi” qala bilirsən.
Karavanla yaşamanın üstünlükləri
1. Azadlıq – Otel bron etməyə, qatar saatına baxmağa ehtiyac yoxdur. Harada gecələmək istədiyin, sənin seçimin olur.
2. Xərclərə qənaət – Uzunmüddətli səfərlər üçün otel və restoran xərclərini minimuma endirir.
3. Təbiətlə iç-içə olmaq – Dağ havasında oyanmaq, dəniz kənarında səhər yeməyi… Karavan bunu mümkün edir.
4. Minimalizm və sadə həyat – Karavan həyatı insana “az əşya, çox təcrübə” fəlsəfəsini öyrədir.
Bəs çətinlikləri?
Təbii ki, hər şey sadə deyil. Karavan həyatının da öz çətinlikləri var:
Tualet və su məsələsi – Su çəninin dolması, kanalizasiya sisteminin idarə olunması başda bir az çətin ola bilər.
Qışda istilik, yayda isə sərinlik sistemi mütləqdir.
Park qaydaları – Bəzi şəhərlərdə karavanla istədiyin yerdə qala bilməzsən.
Texniki biliklər – Bəzən bir vida sıxılmalı, bəzən panel dəyişməlidir. Əl əməyi lazımdır.
Türkiyədə və dünyada karavan modası
Tribunainfo.az xəbər verir ki, Türkiyədə karavan istehsalı və istifadəsi son illərdə sürətlə artıb. Yerli istehsalçılar arasında Crawler, Saly, Viya Karavan kimi firmalar maraqlı və funksional modellər təklif edirlər.
Avropada və Rusiyada da karavan həyat tərzi xüsusilə təqaüdçülər və sərbəst peşə sahibləri arasında yayılıb. “Dörd təkərdə ofis” anlayışı artıq gerçəkdir – Wi-Fi və günəş panelləri ilə təchiz olunmuş karavanlar bu cür həyata imkan yaradır.
Maraqlı fakt: Atik Family və “Maniac Karavan”
Türkiyədə yaşayan Atik ailəsi “Maniac” adlandırdıqları 20 kvadrat metrlik karavanlarında yaşayaraq sosial mediada minlərlə izləyici qazanıb. Onların təcrübəsi göstərir ki, kiçik sahədə də böyük həyat mümkündür.
Karavan almaq istəyənlər üçün məsləhətlər
Bütçəni müəyyənləşdir – Yeni karavanlar 15–80 min dollar arasında dəyişə bilər.
Hansı tip uyğun gəlir? – Çəkilən və ya motorlu? Səyahət planına görə seç.
Enerji və su sistemi önəmlidir – Günəş paneli, inverter, su filtresi kimi sistemlərə bax.
Park və hüquqi tələblər – Bəzi ölkələrdə xüsusi icazə və nömrə tələb olunur.
“Evin olsun, amma dörd təkəri də olsun!”
Karavan həyat tərzi — azad, sadə, sərbəst və sərgüzəştli bir dünya vəd edir. Təbii ki, bu həyat tərzini seçmək cəsarət və uyğunlaşma tələb edir. Amma bir dəfə alışsan, dörd divar arasında qalmış ev anlayışından vaz keçə bilərsən.
İmran Kərimli
