Sentyabrın 4-dən 7-dək Bakıda təşkil olunacaq “WaterTech Bootcamp” ölkəmizdə su ehtiyatlarının idarə olunması sahəsində süni intellekt və innovativ texnologiyaların tətbiqinə həsr olunmuş ən genişmiqyaslı təlim və “hackathon” proqramıdır. Altmış şəxsin iştirak edəcəyi bu intensiv 4 günlük proqramda iştirakçılar su sahəsində qarşılaşdıqları real problemləri dərindən öyrənmək, yeni yanaşmalar və texnoloji həllər yaratmaq imkanı qazanacaqlar.
“Bootcamp” çərçivəsində iştirakçılar su ehtiyatlarının idarə olunması, içməli su təchizatı, tullantı sularının toplanması və təmizlənməsi, meliorasiya və suvarma sistemlərinin effektiv idarə olunması sahələrində ölkənin qabaqcıl ekspertləri tərəfindən keçirilən interaktiv təlim sessiyalarında iştirak edəcəklər. Xüsusi diqqət süni intellektin bu sahələrdə tətbiqinə və rəqəmsal transformasiyanın gətirdiyi yeniliklərə yönəldiləcək.
Tədbirin əsas hissəsi olan “hackathon” mərhələsində isə iştirakçılar komandalar halında real problemləri həll etmək üçün yaradıcılıq və texniki bacarıqlarını nümayiş etdirəcək, mentorların dəstəyi ilə ideyalarını prototiplərə çevirəcəklər. Hackathonun sonunda komandalar layihələrini münsiflər qarşısında təqdim edəcək və ən innovativ həllər mükafatlandırılacaq.
“WaterTech Bootcamp” itirakçılarda innovativ düşüncə və texnoloji bacarıqların inkişafına, su ehtiyatlarının davamlı və səmərəli idarə olunması üçün gələcəyin liderlərinin yetişdirilməsinə dəstək vermək məqsədi daşıyır. Bu proqram, həmçinin iştirakçılara real dünya problemləri ilə işləmə, komanda işi və layihə təqdimatı bacarıqlarını artırmaq üçün unikal təcrübə təqdim edir.
Proqram "Su və Meliorasiya Elmi Tədqiqat İnstitutu" publik hüquqi şəxsi və SUP VC-nin təşkilatçılığı, “EU4ClimateResilience” (Avropa İttifaqının Şərq Tərəfdaşlığında Karbonsuzlaşma və İqlim Dayanıqlılığı) layihəsinin dəstəyi ilə həyata keçirilir. “EU4ClimateResilience” layihəsi Avropa İttifaqı (Aİ) və Almaniyanın Ətraf Mühit, İqlim Fəaliyyəti, Təbiətin Mühafizəsi və Nüvə Təhlükəsizliyi üzrə Federal Nazirliyi (BMUKN) tərəfindən birgə maliyyələşdirilir və GİZ VƏ OECD tərəfindən həyata keçirilir.
Yerlər məhduddur — iştirak etmək və daha ətraflı məlumat almaq üçün qeydiyyatdan keçməyə tələsin!
Qeydiyyat linki: https://forms.gle/BeviNu448r1E3xh88.
Tarix: 4–7 sentyabr, 2025-ci il.
