Dünyada təhsil sistemlərinin effektivliyini ölçən əsas beynəlxalq qiymətləndirmələrdən biri PISA nəticələridir. İqtisadi Əməkdaşlıq və İnkişaf Təşkilatının (OECD) təşkil etdiyi bu qiymətləndirmələr 15 yaşlı şagirdlərin oxu, riyaziyyat və təbiət elmləri üzrə bacarıqlarını ölçür. AzEdu.az ölkələrin hansı fəndə lider olduğunu araşdırıb.
Riyaziyyat sahəsində lider ölkə Sinqapur hesab olunur. Burada şagirdlər yalnız nəzəri deyil, eyni zamanda praktiki məsələlərin həlli üzrə də yüksək nəticələr göstərirlər. Sinqapuru Çin (xüsusilə Şanxay və Pekin bölgələri) və Cənubi Koreya izləyir. Bu ölkələrdə təhsilin strukturlaşdırılmış və sıx nəzarət olunan modeli tələbələrin yüksək nəticələr əldə etməsinə səbəb olur.
Təbiət elmləri üzrə də Sinqapur və Yaponiya öndə gəlir. Bu ölkələrdə təbiət elmlərinin tədrisində laboratoriya əsaslı yanaşmalar, praktiki sınaqlar və təcrübə əsaslı öyrənmə metodları geniş istifadə olunur.
Oxu bacarığı üzrə isə İrlandiya, Finlandiya və Estoniya kimi Avropa ölkələri diqqət çəkir. Bu ölkələrdə şagirdlərin tənqidi düşünmə, mətnləri analiz etmə və mətnlərarası əlaqə qurma bacarıqları yüksək səviyyədədir.
Maraqlıdır ki, Estoniya həm də texnologiya ilə inteqrasiya olunmuş təhsildə qabaqcıl ölkələr sırasındadır. Burada süni intellekt və rəqəmsal platformalar dərslərin bir hissəsinə çevrilib, bu da şagirdlərin interaktiv öyrənməsinə imkan yaradır.
