Çoxumuz mağazaların qarşısında günəş şüaları altında saxlanılan və plastik butulkalarda qablaşdırılmış suları görürük. Habelə bəziləri elə isti havalarda açıq şəraitdə belə suları satır. Üstəlik yay fəslini yaşayırıq. Temperatur bəzən 30-34 dərəcə, hətta daha yüksək olur. Sözügedən mövsümdə qeyd edilən neqativ hallar tez-tez yaşanır.
Bəs bu insan həyatı, sağlamlığı üçün təhlükə mənbəyi deyilmi?
Qida təhlükəsizliyi Hərəkatının rəhbəri, sağlam qidalanma mütəxəssisi Məhsəti Hüseynova Missiya.Az-a açıqlamasında deyib ki, gündəlik istifadə üçün şüşə qablarda satılan sulardan istifadə etmək məsləhətlidir:
"Əgər plastik qablarda olan sular istehlak ediləcəksə, həmin zaman onun uyğun temperaturda saxlanılıb-saxlanılmadığına fikir vermək lazımdır. butulkaların üzərindəki etiketdə suyun 5 dərəcədən 20 dərəcəyə qədər saxlanılması göstərilir. Onların açıq şəraitdə, günəş şüası altına qoyulması suyun tərkibinin dəyişməsinə gətirib çıxarır. Sonra 20 dərəcədən yuxarı temperaturda saxlanıldıqda adı çəkilən plastik qablarda plastik mikrohissəciklər mövcuddur, bunlar "Bisfenol A" maddəsini birbaşa suya keçməsinə və nəticədə riskə səbəb olur. İnsanlar da xəbərsiz şəkildə satın alırlar".
Ekspert vurğulayıb ki, Ümumdünya Səhiyyə Təşkilatında (ÜST), eləcə elmi araşdırmalarda göstərilir ki, "Bisfenol A" su və ya qidaya keçdikdə və bunu mütəmadi qəbul edən şəxslərdə xərçəng xəstəlikləri meydana gələ bilir:
"Ona görə etiktet məlumatları, istehsalçı şirkət haqqında ətraflı məlumat, saxlanılma şəraitinin göstərilməsi, tərkibi və PH səviyyəsi ilə bağlı bilgilər ətraflı yazılmalıdır".
Zərintac MayisqızıMissiya.Az
