Nərimanov Rayon Məhkəməsində hədə-qorxu ilə tələb etmədə təqsirləndirilən Vahid Məmmədovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Kamal Babayevin sədrliyi ilə keçirilən hazırlıq iclasında dövlət ittihamçısı təqsirləndirilən şəxs Cinayət Məcəlləsinin 182.1-ci (hədə-qorxu ilə tələb etmə) maddəsi ilə məhkəməyə verilməsini, işin aidiyyəti üzrə Nərimanov Rayon Məhkəməsinə aid olmasını, işin dayandırılması, yaxud xitam edilməsi üçün heç bir əsasın olmamasını bildirib.
Təqsirləndirilən şəxsin barəsində seçilmiş qətimkan tədbirinin müddətinin bitməsini nəzərə alaraq, onun barəsində həbs qətimkan tədbirinin müddətinin uzadılmasını və işin məhkəmə baxışına təyin edilməsini təklif edib.
Zərərçəkmiş şəxs isə təqsirləndirilən Vahid Məmmədovun ona hədə-qorxu gəldiyi vaxtda Binəqədi rayonunda yerləşən mənzilində olduğunu və sonuncu dəfə pul vəsaitini də məhz həmin ərazidə yerləşən ödəniş terminallarından biri vasitəsilə göndərdiyini qeyd edib. O, işin aidiyyəti üzrə göndərilməsi məsələsinin həll edilməsini məhkəmənin mülahizəsinə buraxdığını bildirib. Təqsirləndirilən şəxs də işin aidiyyəti üzrə göndərilməsini məhkəmənin mülahizəsinə buraxdığını qeyd edib.
Məhkəmə cinayət işinin ərazi aidiyyəti üzrə baxılması üçün Binəqədi Rayon Məhkəməsinə göndərilməsini qərara alıb. Təqsirləndirilən şəxs barəsində seçilmiş həbs qətimkan tədbiri dəyişdirilmədən saxlanılıb.
İttihama görə, Vahid Məmmədov 2024-cü ilin iyun ayında sosial şəbəkədə tanış olduğu zərərçəkmiş S.S. (adı, soyadı şərtidir) ilə sevgi münasibəti görüntüsü yaradaraq onun çılpaq foto və video görüntülərini “Whatsapp” vasitəsilə ələ keçirməyə nail olub. Sonra o, həmin fotogörüntünü və videogörüntünü sosial şəbəkədə yayıb ictimailəşdirəcəyi və ailə üzvlərinə göstərəcəyi, bu şəkildə onu rüsvay edəcəyi barədə qadına hədə-qorxu gəlib. Vahid onun barəsindəki həmin rüsvayedici məlumatların yayılmaması qarşılığında ondan telefon əlaqəsi saxlayıb hədə-qorxu yolu ilə 300 manat pul tələb edib. Qadın isə 2025-ci illərdə Binəqədi rayonu ərazisində təqsirləndirilən şəxsə ümumilikdə 100 manat pul verib.
Hadisədən sonra S.S. hüquq-mühafizə orqanlarına müraciət edib və Vahid Məmmədov saxlanılıb.
Kamal Məmmədov
