Bildiyimiz kimi, Tacikistan hökuməti 30 iyun tarixli qərarı ilə Özbəkistanla Roqun Su Elektrik Stansiyasından (Roqun SES) elektrik enerjisinin tədarükünə dair saziş layihəsini təsdiqləyib. Roqun SES-də istehsal olunan elektrik enerjisi “Uzenerqosotish” (Özbəkistanda elektrik enerjisinin mərkəzləşdirilmiş alqı-satqısı funksiyasını yerinə yetirir) tərəfindən sıfır dərəcə ilə ƏDV daxil olmaqla, 1 kVt/saat üçün 3,4 sent (təxminən 434,2 som) qiymətə alınacaq. Bu qiymət planlaşdırılmış tədarüklərin ikinci ilindən başlayaraq hər il 1 faiz indeksləşdiriləcək.
Hafta.az-ın yazdığına görə, çatdırılmalar Tacikistanın “Barki Tojik” dövlət şirkətindən elektrik enerjisinin idxalı ilə paralel həyata keçiriləcək.
Xatırladaq ki, Özbəkistan onunla əməkdaşlığı 2018-ci ildə bərpa edib.
Tacikistan enerjini tərəflərin razılaşdırdığı qrafikə uyğun olaraq, ilk növbədə Özbəkistanın Vahid Elektrik Enerjisi Sistemində planlaşdırılan gücün kəsiri olduğu saatlarda tədarük edəcək.
Roqun SES-in tikintisi zamanı vegetasiya dövründə (aprelin 1-dən sentyabrın 30-dək) elektrik enerjisi, stansiya tam layihə gücünə çatdıqdan sonra isə ilboyu aylıq veriləcək.
Müqavilə uzadılma imkanı ilə 20 il müddətinə bağlanır.
Tacikistan Roqun SES-in bəndinin tikintisinə 2016-cı ildə başlayıb. SES-in birinci bloku 2018-ci ilin noyabrında, ikinci bloku isə 2019-cu ilin sentyabrında işə salınıb.
Özbəkistan Roqun SES-dən elektrik enerjisi almaq niyyətini hələ 2022-ci ilin yayında bildirmişdi. 2024-cü ildə Qazaxıstanın Roqun SES-dən elektrik enerjisini Özbəkistanın infrastrukturu vasitəsilə idxal etmək planları məlum olub.
