Hindistanın ən böyük şirkətlərindən biri olan "Reliance Industries"in rəqəmsal bölməsi "Jio Platforms" ölkədəki milyonlarla televizoru bulud əsaslı masaüstü kompüterlərə çevirməyi hədəfləyən JioPC xidmətini istifadəyə verib.
Valyuta.az xəbər verir ki, rəqəmsal texnologiyalar sahəsində ölkənin aparıcı qüvvəsinə çevrilən "Jio Platforms" bu yeni təşəbbüsü ilə Hindistanda kompüterə çıxışı radikal şəkildə dəyişə biləcək bir addım atıb. "Reliance Industries"in rəhbəri və Hindistanın ən varlı iş adamı olan Mukeş Ambaninin rəhbərliyi ilə təqdim edilən JioPC xidməti "Jio Platforms"un ev interneti abunəliyinə daxil olaraq ya tamamilə pulsuz təqdim olunur, ya da ayrıca olaraq təxminən 64 ABŞ dollarına satılan "Jio Platforms set-top box (set üstü qutu) ilə əldə edilə bilər.
Hazırda yalnız dəvət sistemi ilə əldə edilə bilən xidmətin sınaq mərhələsi davam edir. İstifadəçilər, televizorlarına klaviatura və siçan qoşaraq cihazlarını dərhal bulud əsaslı masaüstü kompüterə çevirə bilirlər.
Hazırkı mərhələdə JioPC bəzi əlavə cihazları, məsələn kamera və printerləri dəstəkləməsə də, gündəlik ofis işləri üçün açıq mənbə kodlu "LibreOffice" proqram paketi ilə təchiz olunub. "Microsoft Office" tətbiqlərinə isə yalnız xidmətin daxilindəki internet brauzeri vasitəsilə çıxış mümkündür. Bu texniki məhdudiyyətlərə baxmayaraq, JioPC layihəsi kağız üzərində olduqca perspektivli görünür.
Tədqiqat şirkəti "Counterpoint"in araşdırma direktoru Tarun Patak "TechCrunch"a verdiyi açıqlamada bildirib ki, bu təşəbbüs Jio Platforms"un 488 milyondan çox istifadəçisinə yenilərini əlavə etmək üçün güclü bir strategiyadır. Onun sözlərinə görə, Hindistanda evlərin təxminən 70 faizində televizor olsa da, kompüter sahibi olan evlərin nisbəti yalnız 15 faiz civarındadır. Bu fakt JioPC-nin virtual masaüstü təcrübəsi ilə bu boşluğu doldura biləcəyini və geniş istifadəçi bazasına çatacağını göstərir.
Hindistanda internet əsaslı TV xidmətləri sürətlə yayılır və aktiv ödənişli TV set üstü qutusu istifadəçilərinin sayı artıq 57 milyona yaxınlaşıb. Bu isə JioPC kimi xidmətlər üçün böyük bir potensial auditoriya deməkdir.
Ölkənin ümumi kompüter bazarı isə 2024-cü ilin ilk rübündə illik müqayisədə 8 faizdən çox böyüyərək 3,3 milyon ədəd səviyyəsinə çatıb və ardıcıl yeddinci rübdə də artım göstərib. Lakin ABŞ və Çin kimi böyük bazarlarla müqayisədə Hindistanda kompüter sahibliyi hələ də aşağı səviyyədədir. Bunun əsas səbəbləri arasında məhdud sərf olunabilən gəlir və smartfonların əsas hesablama cihazı kimi geniş istifadə olunması göstərilir.
Sonda isə əsas sual budur: JioPC Hindistanda daha çox insana sərfəli və əlçatan kompüter təcrübəsi təqdim edərək bu mənzərəni dəyişə bilərmi? Cavabı zaman göstərəcək, lakin bu təşəbbüs artıq texnologiya dünyasında ciddi maraq doğurub.
Paşa Məmmədli
