"Azfen" MMC 2024-cü ili 25 milyon 915 min manat xalis zərər ilə başa vurub. Halbuki, Şirkət 2023-cü ili 11 milyon 466 min manat xalis mənfəət ilə bağlamışdı.
Marja.az Şirkətin 31 dekabr 2024-cü il tarixində başa çatan il üzrə maliyyə hesabatlarına istinadən xəbər verir ki, "Azfen" MMC-nin müştərilərlə müqavilədən gəlirləri 2023-cü ildə 217 milyon 553 min manat ikən, 2024-cü ildə 75 milyon 217 min manata düşüb (2,9 dəfə azalıb).
Ötən il müştərilərlə müqavilədən 75 milyon 217 min manat gəlirlərə qarşı müqavilə xərcləri 98 milyon 881 min manat təşkil edib və nəticədə 23 milyon 664 min manat ümumi zərər yaranıb. İnzibati və digər xərclər ilə əlaqədar olaraq Şirkətin zərəri daha da artıb.
"Azfen" MMC-nin bölüşdürülməmiş mənfəəti ötən ilin xalis zərəri məbləğində - 25 milyon 915 min manat azalaraq 225 milyon 339 min manata düşüb.
Qeyd edək ki, "Azfen" MMC 1996-cı ilin yanvarında Azərbaycan Respublikası Dövlət Neft Şirkəti (60% sahiblik hüququ ilə) və TEKFEN İnşaat və Təsisat A.Ş. (40% sahiblik hüququ ilə) tərəfindən təsis edilmişdir. Şirkətin məqsədi neft şirkətləri üçün yüksək səviyyəli tikinti və mühəndislik işlərini həyata keçirməkdən ibarətdir.
