Rusiya Prezidenti Vladimir Putin ölkənin ya müstəqilliyini və suverenliyini qoruyacağını, ya da dövlət kimi mövcudluğunu dayandıracağını bildirib.
Publika.az xəbər verir ki, o bu barədə "Rossiya" telekanalına müsahibəsində deyib.
O vurğulayıb ki, Rusiya müstəqil və suveren dövlət kimi başqa cür mövcud ola bilməz. Putin həmçinin qeyd edib ki, ABŞ-ın qlobal təsirinə görə bir çox ölkələr susmağa üstünlük verir.
"Bu, mübahisə və ya müxalifət xatirinə deyil, biz sadəcə olaraq başqa cür yaşaya bilmərik", - prezident "Rossiya" telekanalına müsahibəsində deyib.
Vladimir Putin həmkarlarının 2007-ci ildə Münhen Təhlükəsizlik Konfransı üçün hazırladığı nitqin mətnini yenidən yazmaq qərarını da xatırladıb. O, beynəlxalq münasibətlərlə bağlı narahatlığını ifadə edərək, Rusiyanın mövqeyini müstəqil şəkildə ortaya qoymağı vacib hesab edib. Prezidentin sözlərinə görə, birbaşa müraciət beynəlxalq dialoqda mövcud problemlərə diqqəti cəlb etməyə və Rusiyanın xarici siyasətinin əsas prinsiplərini müəyyənləşdirməyə kömək etdi.
