Bizimyol saytından əldə olunan məlumata görə, ain.az məlumat yayır.
Şabranda aprelin ortalarında yağan güclü yağışlar nəticəsində çaylarda suyun səviyyəsinin artması böyük faciəyə səbəb olmuşdu. Üç nəfər həyatını itirmiş, üstəlik, xeyli fərdi təsərrüfat sıradan çıxmışdı. Fərdi təsərrüfatlar sakinlərin öz gücünə bərpa olunur. Dağılmış körpülər isə yararsız vəziyyətdə də qalıb.
Bizimyol.info Şabranın bir neçə kəndinə gedən sıradan çıxmış yolun görüntülərini sizə təqdim edir. Buradakı körpünü sel aparıb. Həmin yol rayonun Veysəlli, Ceyranlı, Əmirxanlı kəndlərinə uzanır. Aprelin 16-da burada hərəkət tamamilə dayanmışdı. Çünki adları çəkilən kəndlərdən rayon mərkəzinə gedib gələn yolda - çayın üstündəki körpümü sel aparmışdı.
Sakinlər deyir ki, bir müddət məcbur olub, bəzi maşınlar çayın içi ilə hərəkət etmək məcburiyyətində qalıb. Sonradan icra strukturunun nümayəndələri həmin ərazidə kustar üsulla keçid düzəldiblər. Amma oradan avtomobillərin buradan hərəkəti çox təhlükəlidir.
“Maşınlara o yolda çox ziyan dəyir. Başqa çarə də yoxdur. Təsəvvür edin, çayın üstündə körpü yoxdur, yol gəlir, çaya gəlib çatanda qəfildən kəsilir. Ortada heç bir xəbərdarlıq nişanı qoyulmamışdı. Mayda yoldakı vəziyyətdən xəbərsiz olan bir sürücü qaranlıq vaxtı bilməyib, gəlib orada maşınla çaya düşmüşdü. Xoşbəxtlikdən ölüm-itim olmadı. Ondan sonra yola o tərəfdən də, bu tərəfdən də kol-kos yığıb, lent kəsdilər ki, çaya düşən olmasın. Amma torpaq yolla çayın üstündən olan müvəqqəti yol da elədir ki, maşım bir az oyan-bu yan eləsə, çaya düşəcək. Yəni çox təhlükəlidir. Yeni körpü tikintisi üçün də heç bir iş görmürlər. Qalmışıq təhlükə altında”, - Şabran sakinləri bildirir.
Çayın üzərindəki körpünün bərpası üçün öhdəlik daşıyan Azərbaycan Avtomobil Yolları Dövlət Agentliyi (AAYDA) məsələyə biganə yanaşır.
Şabran Rayon İcra Hakimiyyəti başçısının müavini, eyni zamanda İcra Hakimiyyətinin Sosial iqtisadi inkişafın təhlili və proqnozlaşdırılması şöbəsinin müdiri Natəvan Mustafayeva deyir ki, agentliyə məktub göndəriblər:
“Həmin yol “Azəravtoyol”un balansındadır. Sel və daşqın zamanı rayon icra hakimiyyəti texnikalarla, qreyderlərlə alternativ yol təşkil edib. Həmin yolun bərpası üçün “Azəravtoyol”a məktub da göndərmişik”.
Bizimyol.info AAYDA-nın da mövqeyini öyrənməyə çalışıb. Qurumun ictimaiyyətlə əlaqələr şöbəsinin rəhbəri Anar Nəcəfli ilə dəfələrlə əlaqə saxlamağa çalışsaq da, mümkün olmayıb. Onun telefonuna günlərlə zəng çatmayıb və ya əhatə dairəsində olub. Belə olan halda, sualımızı ona “WhatsApp” vasitəsilə göndərmişik. Mesaj dərhal gedib çatmasına baxmayaraq, günlərdir Anar Nəcəfli heç bir cavab vermir.
Mövsümü və Anar Nəcəflinin məzuniyyətdə ola biləcəyini nəzərə alaraq, AAYDA-nın ictimaiyyətlə əlaqələr şöbəsindən başqa bir əməkdaşla əlaqə saxladıq. Lakin o bildirdi ki, Anar Nəcəfli iş başındadır və şöbənin rəhbəri kimi, suala da özü cavab verməlidir.
Belə görünür ki, AAYDA-nın belə tezliklə problemi həll etmək niyyəti yoxdur. Bu dağ kəndlərinə isə qış bəzən erkən gəlir. İndi sakinlər müəyyən risk sayəsində Şabranla əlaqəni kəsmirlər. Amma bir neçə ay sonra alternativ yoldan istifadə mümkünsüz olacaq.
Aytən, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
