Vətəninfo.az xəbər verir ki, Türkiyənin pilotsuz təyyarə istehsalçısı Baykar, TB2 pilotsuz təyyarələrinin İtaliyada istehsalına başladığını elan etdi. Şirkətin rəsmi açıqlamasına görə, İtaliyanın Piaggio Aerospace zavodlarında təkcə TB2-lər deyil, həm də daha ağır Akıncı hücum pilotsuz təyyarələri istehsal ediləcək.
Baykar, “Bu gün xidmətdə olan ən qabaqcıl pilotsuz uçuş aparatlarından ikisi olan AKINCI və TB2-nin istehsalı, bu sistemlərə artan tələbatı ödəmək üçün Piaggio Aerospace-ə köçürüləcək” dedi.
Bu addım Türkiyəyə Avropa silah bazarında mövqeyini gücləndirməyə imkan verir. Hələ mart ayında İtaliyanın Leonardo şirkəti türkiyəli həmkarı ilə anlaşma memorandumu imzalayıb. Razılaşmaya əsasən, Leonardo təyyarə sistemlərinin və yüklərin inkişafına, Baykar isə pilotsuz uçuş aparatlarına diqqət yetirəcək. Əməkdaşlığın hər iki şirkətin qlobal bazarda mövqelərini gücləndirəcəyi gözlənilir.
Bu günə qədər TB2 ən azı 13 ölkəyə ixrac edilib. Ukraynadakı münaqişə ilə yanaşı, bu dronlardan 2020-ci ildə də Qarabağ döyüşlərində də fəal şəkildə istifadə olunub.
Pilotsuz təyyarələr daha əlverişli və geniş şəkildə əlçatan olduqca, Ankara hücum dronlarının dünyanın aparıcı istehsalçılarından biri statusunu möhkəmləndirməyə çalışır. İtaliyalı tərəfdaşlarla birgə istehsalın başlanması türk pilotsuz təyyarələri üçün Aİ bazarına birbaşa yol açır və Türkiyənin mövqeyini gücləndirir.
