İranın nüvə obyektlərinə hücum üçün Türkiyə hava məkanından istifadə edildiyinə dair iddialar həqiqətə uyğun deyil.
Oxuməni.az -ın xəbərinə görə, Türkiyə Prezident Administrasiyasının Kommunikasiyalar İdarəsinin Dezinformasiya ilə Mübarizə Mərkəzi rəsmi açıqlama yayaraq, Amerika hərbi təyyarələrinin İranın nüvə obyektlərinə zərbələr endirmək üçün Türkiyə hava məkanından istifadə etməsi ilə bağlı iddiaları təkzib edib.
"Bu yaxınlarda müxtəlif media mənbələrində İranın nüvə obyektlərini vuran Amerika bombardmançılarının Türkiyənin hava məkanından istifadə etdiyinə dair iddialar yayılıb. Bu iddialar həqiqətə uyğun deyil və açıq şəkildə dezinformasiyadır", - açıqlamada deyilir.
Qeyd olunur ki, İsrailin İrana qarşı başlatdığı hücumlar zamanı Türkiyə Respublikasının hava məkanı nəinki pozulmayıb, hətta heç bir şəraitdə istifadə edilməyib.
Dezinformasiya ilə Mübarizə Mərkəzi qeyd edib ki, bombardmançı təyyarələr ABŞ-dan havaya qalxıb, Cəbəllütariq boğazı vasitəsilə bölgəyə daxil olub, Aralıq dənizinin cənubu üzərindən uçub, İsrailə çatıb, sonra isə İraqın hava məkanı vasitəsilə İran ərazisini vurub. Missiyanı başa vurduqdan sonra bombardmançılar eyni marşrutla geri qayıdıblar.
Almaz Həsənli
