BAKI, TurkicWorld
Son illərin ən parlaq UFC ulduzlarından biri olan İslam Maxaçev, güclü texniki hazırlığı, peşəkarlığı və döyüş strategiyası ilə beynəlxalq arenada böyük nüfuz qazanıb. O, hazırda UFC-nin (Ultimate Fighting Championship) yüngül çəki dərəcəsində dünya çempionu titulunu daşıyır və Dağıstandan çıxmış ən uğurlu qarışıq döyüş növləri (MMA) idmançılarından biri kimi tanınır.
İslam Maxaçev 1991-ci il oktyabrın 27-də Rusiya Federasiyasının Dağıstan Respublikasına bağlı Saxi kəndində anadan olub. Erkən yaşlarından etibarən idmana, xüsusilə də güləş və döyüş sənətlərinə böyük maraq göstərib. Onun ilk peşəkar hazırlığı sambo və sərbəst güləş sahəsində olub. Bu sahələrdə qazandığı uğurlar və intizamlı yanaşması ona gələcək MMA karyerası üçün möhkəm təməl yaradıb.
İslam Maxaçevin döyüş karyerasında böyük rol oynayan fiqurlardan biri keçmiş UFC çempionu Həbib Nurmaqomedov olub. Onların dostluğu uşaq yaşlarından başlayıb və bu günə qədər davam edir. Maxaçev hazırda məşqçi Xavyer Mendezin rəhbərliyi altında, ABŞ-ın məşhur “American Kickboxing Academy” klubunda hazırlıq keçir. Bu birlik onun texniki inkişafına və beynəlxalq döyüşçü kimi formalaşmasına ciddi təsir göstərib.
Maxaçev UFC-də ilk döyüşünü 2015-ci ildə keçirib. Zamanla bir çox tanınmış döyüşçü üzərində qələbə qazanaraq yüngül çəki dərəcəsində titul döyüşünə vəsiqə qazanıb. 22 oktyabr 2022-ci ildə Əbu-Dabidə keçirilən UFC 280 tədbirində Charles Oliveira ilə qarşılaşan Maxaçev, rəqibini ikinci raundda boğma fəndi ilə məğlub edərək UFC yüngül çəki çempionu titulunu qazanıb.
O, 2023 və 2024-cü illərdə çempionluq titulunu avstraliyalı UFC çempionu Aleksandr Volkanovskiyə qarşı uğurla müdafiə edib.
İslam Maxaçevin döyüş tərzi əsasən yerə salma, boğma və nəzarət taktikası üzərində qurulub. O, sambo və güləşdəki təcrübəsini MMA qaydalarına mükəmməl şəkildə uyğunlaşdıraraq rəqiblərinə böyük çətinliklər yaradır. Həmçinin sakitliyi, təmkinli davranışı və idmandan kənar qalmaqallardan uzaq durması onun azarkeşlər arasında nüfuzunu daha da artırır.
