İranın ali dini lideri Ayətullah Əli Xamenei İsrailin hücumlarının artmasından sonra “fövqəladə bir sıra addımlar” atdığı iddia edilir.
“The New York Times” qəzetinin İran rəsmilərinə istinadən verdiyi məlumata görə, Xameneyi hücumlar başlayandan bəri bunkerdə gizlənir və öldürüləcəyi təqdirdə üç mümkün varisini gizli şəkildə müəyyənləşdirib.
Bildirilib ki, 86 yaşlı Xameneyi doqquz gün əvvəl başlayan və bir neçə yüksək vəzifəli məmurun ölümünə səbəb olan hücumlardan sonra İsrailin daha yüksək səviyyəli liderləri hədəfə ala biləcəyindən şübhələndiyi üçün bu addımları atıb.
Müvafiq olaraq, dini lider hərbi komandanlıq silsiləsi üçün əvəzedici adlar da təyin edib.
Şəxsiyyətinin açıqlanmasını istəməyən üç iranlı mənbə bildirib ki, Xameneyi indi komandirlərlə yalnız köməkçisi vasitəsilə əlaqə saxlayır və aşkarlanmamaq üçün bütün rəqəmsal ünsiyyətdən imtina edib.
Mənbələrin bildirdiyinə görə, Xameneyi İranın ali liderinin seçilməsindən məsul olan Ekspertlər Məclisinə göstəriş verib və onlardan hakimiyyətin rahat və sürətli keçidini təmin etmək üçün təyin etdiyi üç addan birini tez seçməyi xahiş edib.
***
İsrail iyunun 13-də İranın paytaxtı Tehranı hədəfə alıb. Partlayışlar şəhərin bir çox yerində əks-səda verib. İsrail hücumda nüvə və hərbi obyektlərin vurulduğunu açıqlayıb.
İsrailin baş naziri Benyamin Netanyahunun “Yüksələn Aslan” adlandırdığı əməliyyat zamanı 200-ə yaxın İsrail təyyarəsi iştirak edib və 100-ə yaxın hədəf vurulub.
Hücumlarda nüvə proqramı ilə əlaqəli yüksək səviyyəli komandirlər və nüvə alimləri öldürüldü.
Hücum İranın nüvə proqramında sürətlə irəliləməsi səbəbindən gərginliyin pik həddə çatdığı bir vaxta təsadüf edir. Hücumdan bir gün əvvəl (12 iyun) Beynəlxalq Atom Enerjisi Agentliyinin (MAQATE) Rəhbərlər Şurası İranı 20 ildə ilk dəfə müfəttişlərlə əməkdaşlıq etmədiyinə görə rəsmi şəkildə qınayıb.
Hücumun ilk saatlarında ABŞ dövlət katibi Marko Rubio İsrailin İrana hücumlarında ABŞ-ın heç bir rolunun olmadığını bəyan edərək, Tehrana ABŞ-ın maraqlarını və şəxsi heyətini hədəf almaması ilə bağlı xəbərdarlıq edib.
Bununla belə, ABŞ prezidenti Donald Tramp deyib ki, İran razılaşma əldə etməlidir, əks halda növbəti hücumlar “daha qəddar olacaq”.
