İran və Aİ3 (Fransa, Böyük Britaniya, Almaniya) növbəti iki həftə ərzində nüvə məsələlərinə dair yenidən görüş keçirə bilər.
AFN.az xəbər verir ki, bu barədə adı açıqlanmayan avropalı diplomata istinadən “The Washington Post” qəzeti yazıb.
İyunun 20-də Cenevrədə Aİ3-ün xarici işlər nazirləri İranın xarici işlər naziri Abbas Əraqçi ilə danışıqlarda iştirak ediblər. Amerika lideri Donald Tramp bildirib ki, Birləşmiş Ştatlar Vaşinqtonun İslam Respublikasına zərbə endirməsinin qarşısını alaraq, Tehranın nüvə inkişafı ətrafında yaranmış böhranı diplomatik yollarla həll etməyə çalışması üçün İrana “maksimum iki həftə” verməyə hazırdır.
“Yeni görüşün tarixi hələ müəyyən edilməyib, lakin rəsmilər iki həftə ərzində, Trampın təyin etdiyi müddətdən əvvəl görüşmək niyyətindədirlər”, - deyə nəşr yazır.
Nəşrin həmsöhbətlərinin sözlərinə görə, Cenevrədəki görüş heç bir irəliləyiş olmadan başa çatıb.
