Dünyanın ən yaşana bilən şəhərlərinin siyahısı bu il yenilənib. Economist Intelligence Unit (EIU) tərəfindən hazırlanan Qlobal Yaşanabilənlik İndeksinə əsasən, builki lider Danimarkanın paytaxtı Kopenhagendir. Kopenhagen son üç ildir siyahının başında olan Avstriyanın paytaxtı Vyananı geridə qoyaraq birinci yerə yüksəlib.
Hafta.az-ın yazdığına görə, EIU səhiyyənin keyfiyyəti, təhsil sistemi, sabitlik, infrastruktur və ətraf mühit faktorları kimi meyarlara görə 173 şəhərdə kütləvi qiymətləndirmə aparıb.
Üç ildir ki, birinciliyini heç kimə itirməyən Vyana bu il sabitlik göstəricilərinin azalması səbəbindən ikinci yerə düşüb. Xüsusilə təhlükəsizlik və ictimai asayişlə bağlı problemlər şəhərin ümumi reytinqini aşağı salıb.
CNN-in məlumatına görə, keçən il planlaşdırılan, lakin bomba təhlükəsi səbəbiylə təxirə salınan Teylor Sviftin konserti kimi hadisələr də bu azalmaya təsir edib. Bu inkişaflar Vyananın əvvəllər güclü olduğu “sabitlik” kateqoriyasında zəif xal almasına səbəb olub.
Ötən il ilk 10-luqda olan Kalqari bu il siyahıda 18-ci yerə düşüb. Kanadada səhiyyə sisteminin artan yükü bir çox şəhərlərin səhiyyə xidmətlərinə mənfi təsir göstərib. Toronto da 12-ci yerdən 16-cı yerə düşüb.
İlk 25-liyə yalnız ABŞ-dan Honolulu şəhəri daxil olub. Havay adalarının paytaxtı 23-cü yerdə ölkənin ən yaşana bilən şəhəri kimi seçilib.
2025-ci ilin ən yaşana bilən 10 şəhəri aşağıdakılardır:
1. Kopenhagen (Danimarka), 2. Vyana (Avstriya), 3. Sürix (İsveçrə), 4. Melburn (Avstraliya), 5. Cenevrə (İsveçrə), 6. Sidney (Avstraliya), 7. Osaka (Yaponiya), 8. Oklend (Yeni Zelandiya), 9. Adelaida (Avstraliya), 10. Vankuver (Kanada).
