İranın xüsusi xidmət orqanları İsfahanda “dron və minaatan istehsalı emalatxanası” aşkar ediblər,
KONKRET.az bildirir ki, bu barədə “Fars” xəbər agentliyi məlumat yayıb.
Kərəcdə isə partlayıcı maddələrin istehsalı ilə məşğul olan “Mossad agenti”nin həbs edildiyi bildirilir.
Xorasan Rəzəvi vilayətinin polis rəisinin müavini qeyd edib ki, İranın Hava Hücumundan Müdafiə Qüvvələri Məşhəd şəhərinin hava limanının yaxınlığında İsrailə məxsus PUA-nı vurub.
Onun sözlərinə görə, hava hücumundan müdafiə sistemləri ötən gecə eyni bölgədə bir neçə İsrail pilotsuz təyyarəsini də vura bilib.
Bu arada İsrailli hakerlər İranın bank sistemini sıradan çıxarıblar.
Vətəndaşlar pul çıxara bilmir, bankomatlar işləmir.
Şiraz və Tehranda hava hücumundan müdafiə sistemləri işə salınıb. Tehranın bir neçə bölgəsində partlayış səsləri eşidilib.
İran paytaxtında yanacaq almaq üçün uzun növbələr yaranıb.
Müşviq Tofiqoğlu
KONKRET.az
