BAKI, TurkicWorld
Tehran yaxınlığında hava hücumundan müdafiə bölmələri İsrail tərəfindən vurulub.
TurkicWorld xəbər verir ki, İsrail ordusu İranın paytaxtı Tehran yaxınlığındakı hava hücumundan müdafiə bölmələri və raket buraxılış meydançasına zərbələr endirdiyini açıqlayıb.
Ordunun bəyanatında bu hücumların “hava üstünlüyü yaratmaq” məqsədilə həyata keçirildiyi bildirilib və hadisənin görüntüləri ictimaiyyətlə paylaşılıb.
İsrail Hərbi Hava Qüvvələrinin Tehranın cənubunda yerləşən strateji hərbi obyektləri hədəfə aldığı bu əməliyyat, ölkələr arasında gərginliyin daha da artmasına səbəb olub.
Qeyd edək ki, iyunun 13-də İsrailin İranın müxtəlif şəhərlərindəki nüvə obyektlərinə və hərbi rəhbərliyə qarşı başladığı irimiqyaslı hücumlar nəticəsində İranın Baş Qərargah rəisi, İnqilab Keşikçiləri Korpusunun baş komandanı, 9 nüvə alimi və bir sıra yüksək rütbəli zabitlər həlak olub. Rəsmi məlumatlara görə, hücumlarda ümumilikdə 224 nəfər həyatını itirib.
İran isə cavab olaraq İsrailin Tel-Əviv və digər şəhərlərinə ballistik raketlər göndərib. Bu cavab hücumunda 21 nəfərin öldüyü, 500-dən çox insanın yaralandığı bildirilib. Münaqişəyə beynəlxalq reaksiyalar artmaqda davam edir. Türkiyə başda olmaqla bir çox ölkə İsrailin hücumlarını qınayıb.
