Musavat.com xəbər verir ki, İranın Səhiyyə Nazirliyi son 3 gün ərzində İsrailin həyata keçirdiyi hava hücumları nəticəsində ən azı 224 vətəndaşın həlak olduğunu açıqlayıb. Rəsmi məlumatda qeyd olunur ki, ölənlər arasında onlarla uşaq və qadın da var.
Hücumlar əsasən Tehran, İsfahan, Təbriz və Məşhəd şəhərlərində qeydə alınıb. Genişmiqyaslı dağıntılar fonunda onlarla yaşayış binası və strateji obyekt tamamilə məhv edilib. Səhiyyə Nazirliyi bildirir ki, xəsarət alanların sayı 600 nəfəri keçib, onlardan çoxunun vəziyyəti ağırdır.
İran rəhbərliyi hadisələri “dövlətə qarşı silahlı təcavüz və soyqırım aktı” kimi qiymətləndirib. Eyni zamanda bəyan olunub ki, bu hücumlara cavab daha geniş və sərt olacaq.
Beynəlxalq hüquq müdafiə təşkilatları da bölgədəki vəziyyətdən ciddi narahatlıqlarını ifadə edərək, ölənlərin real sayının daha çox ola biləcəyini bəyan ediblər.
Rəsmi Tehran artıq BMT və digər beynəlxalq qurumlara müraciət göndərib və bölgədə iztirablı humanitar böhranın baş verdiyini bəyan edib.
Qeyd edək ki, İsrail ordusu hücumların yalnız İranın hərbi obyektlərinə qarşı yönəldiyini açıqlasa da, sivil itkilərin miqyası dünya ictimaiyyətində ciddi rezonansa səbəb olub. Regionda gərginliyin yaxın günlərdə daha da artacağı istisna edilmir.
Musavat.com
