Almaniyada təqaüdə çıxdıqdan sonra işləməyə davam edənlərin sayı son illərdə əhəmiyyətli dərəcədə artıb. Federal Statistika İdarəsinin məlumatlarına görə, 2023-cü ildə 67 və daha yuxarı yaşda olan 1,1 milyondan çox insan hələ də işçi kimi çalışır. Bu rəqəm 2004-cü ildə qeydə alınmış 288,000 nəfərlə müqayisədə təxminən dörd dəfə çoxdur.
Almaniyada ümumilikdə 21,4 milyon təqaüdçü var. Lakin yaşayış xərclərinin artması, pensiyaların və sağlamlıq xərclərinin kifayət etməməsi səbəbindən bir çox insan təqaüd zamanı işləmək məcburiyyətində qalır. Ekspertlər bu vəziyyətin iqtisadi təzyiqlərin nəticəsi olduğuna diqqət çəkirlər.
***
Bu məsələ həm də ölkənin pensiya sistemi ilə bağlı müzakirələri yenidən alovlandırıb. Xüsusilə CDU-nun baş katibi Karsten Linnemanın “Almaniyada təqaüdçülər çox az işləyir” açıqlaması sərt tənqidlərə səbəb olub.
“BSW” lideri Sahra Vagenknext bu sözlərin təqaüdçüləri ələ salmaq üçün nəzərdə tutulduğunu iddia edərək, "Bu gün əvvəlkindən daha çox təqaüdçü işləyir. Bu tendensiya insanları 70 yaşına qədər işləməyə məcbur edəcək", – deyib.
Vagenknextə görə, işləyən təqaüdçülərin sayındakı bu sürətli artım açıq şəkildə göstərir ki, yaşlı əhalinin böyük bir hissəsi dolana bilmir. Müzakirələr Almaniyanın pensiya siyasətlərinə təzyiqi artırsa da, ictimaiyyətdə sosial təminat sistemi ilə bağlı narahatlıqlara da səbəb olur.
