İsrail hərbçiləri Aralıq dənizində Qəzza zolağına humanitar yardım aparan, heyətində 12 nəfər – o cümlədən ekofəal Qreta Tunberqin də olduğu Madleen adlı yaxtanı ələ keçiriblər. İsrail əvvəldən bəyan etmişdi ki, həmin gəminin Qəzza sahillərinə çatmasına icazə verilməyəcək.Yaxta gecə saatlarında göyə çıxarılaraq saxlanılıb. Böyük Britaniya bayrağı altında üzən və “Azadlıq Flotilyası” koalisiyası tərəfindən idarə olunan Madleen artıq Aşdod limanına aparılıb. Bu barədə İsrailin müdafiə naziri İsrael Kats məlumat verib. İsrailin Kan telekanalı gəminin Aşdod limanına çatdığını təsdiqləyib.Fəallar məqsədin sadəcə simvolik humanitar yardım (düyü və uşaq qidası daxil olmaqla) aparmaq və beynəlxalq diqqəti Qəzzadakı humanitar böhrana yönəltmək olduğunu bildiriblər.İsrail Xarici İşlər Nazirliyi isə məsələyə belə münasibət bildirib: “Şöhrətpərəstlərin ‘selfi-yaxtası’ artıq İsrail sahillərinə doğru təhlükəsiz istiqamət alıb. Gözlənilir ki, sərnişinlər öz ölkələrinə geri qaytarılacaqlar”. Nazirlik əlavə edib ki, sərnişinlərin hamısı sağ və salamatdır. “Qreta və digərləri cəmi bir yük maşınından da az humanitar yüklə mediaya yönəlmiş təxribat etmək istədikləri vaxtda, son iki həftədə İsrail Qəzzaya 1200-dən çox humanitar yük maşını göndərib. Bundan başqa, Qəzza Humanitar Fondu 11 milyon porsiya yeməyi birbaşa mülki əhaliyə paylayıb”.“Qəzza zolağına humanitar yardım göndərməyin selfi çəkmədən də yolları var,” – deyə İsrailin Xarici İşlər Nazirliyi bildirib. Nazirlik fəalların gəmisindəki “cüzi humanitar yükün” humanitar kanallar vasitəsilə Qəzzaya çatdırılacağını vəd edib.Daha öncə “Azadlıq Flotilyası” Telegram kanalında “Madleen ilə əlaqə kəsildi” xəbəri paylaşılmışdı. Fəallar İsrail hərbçiləri tərəfindən “qaçırıldıqlarını” bəyan ediblər. Təşkilat insanların xilasedici jiletlərdə, əlləri havada oturduqları fotoşəkili yayımlayıb.22 yaşlı Qreta Tunberqlə birlikdə gəmidə ümumilikdə 12 fəal olub. Madleen gəmisi Siciliyadan yola çıxaraq İsrailin tətbiq etdiyi dəniz blokadasını yarıb Qəzzaya yardım çatdırmaq məqsədi güdürdü.Bazar günü İsrailin müdafiə naziri İsrael Kats gəminin Qəzza sahillərinə çatmasının qarşısını almaq üçün “lazımi bütün tədbirlərin görüləcəyini” və ordunun müvafiq göstərişlərlə hərəkətə keçdiyini bəyan edib. Sosial şəbəkədə Tunberqə və digər fəallara xitabən yazıb: “Siz geri dönməlisiniz, çünki Qəzzaya çata bilməyəcəksiniz. Mən İsrail Müdafiə Ordusuna göstəriş verdim ki, Madleen gəmisinin Qəzza sahillərinə yaxınlaşmasının qarşısını alsın.”Kats fəallar haqqında sərt ifadələr işlədib: “Antisemit Qreta və HAMAS-ın təbliğatçılarına açıq deyirəm: Qayıdın! Qəzzaya çata bilməyəcəksiniz. İsrail blokadanı yarmaq və ya terrorçu təşkilatlara yardım cəhdlərinə qarşı — dənizdə, havada və quruda hərəkət edəcək.”Fransada yaşayan fələstinli siyasətçi Rima Həsən bildirib ki, “Azadlıq Flotilyası”nın heyəti gecə saat 2-də beynəlxalq sularda İsrail ordusu tərəfindən həbs olunub.“Azadlıq Flotilyası” Katsın bəyanatını “İsrailin dinc vətəndaşlara qarşı qanunsuz güc tətbiqini və bu zorakılığı yalan bəyanatlarla əsaslandırmaq cəhdini əks etdirən daha bir nümunə” adlandırıb.
“Biz hədələrə boyun əyməyəcəyik. Dünya bizi izləyir. Heç bir sionist təbliğat gerçəyi gizlədə bilməz: İsrail kobud hərbi güc vasitəsilə genosid xarakterli blokada tətbiq edir və beynəlxalq hüququ, insani dəyərləri açıq şəkildə pozur,” – bəyanatda vurğulanıb.Türkiyə Xarici İşlər Nazirliyi də İsrailin müdaxiləsini pisləyərək bunun dəniz təhlükəsizliyinə təhdid olduğunu və İsrailin bir daha “terrorçu dövlət kimi” hərəkət etdiyini bildirib.
Qeyd edək ki, “Azadlıq Flotilyası” may ayında da oxşar cəhd göstərmişdi. Lakin həmin səfər zamanı başqa bir gəmi Malta sahillərində beynəlxalq sularda dron hücumuna məruz qalaraq zədələnmişdi. Fəallar həmin hücumda da İsraili günahlandırmışdılar.Ulusum.az
Diqqət Çəkənlər
Rusiya-Ukrayna Müharibəsinin 1200-cü Günündə Eskalasiya
“Hörümçək Toru”na cavab gecikmədi: Moskva Kiyevi belə susdurmaq istəyir
ƏN QOCAMAN VƏ ƏN PÖHRƏ ÇİNARLARIN YAŞIDI - Rafael Hüseynov yazır
