“Bakı Enerji Həftəsi”nin açılış mərasimində cənab Prezident İlham Əliyev çıxışı zamanı bir sıra strateji məqamlara toxundu. Dövlət başçımızın qeyd etdiyi kimi, Azərbaycanın neft strategiyası bir tərəfdən ölkədə infrastrukturun, eləcə də sosial təminat sisteminin daha da inkişafına imkan yaratdı. Digər tərəfdən Azərbaycan investisiya cəlb edən ölkədən investor dövlətə çevrildi. “Əsrin müqaviləsi” bağlanan zaman Azərbaycanın ciddi sərmayə qoyuluşlarına ehtiyacı vardı və Ulu Öndər Heydər Əliyevin rəhbərliyi ilə imzalanan müqavilədə Azərbaycanın milli maraqları tam olaraq təmin olundu və Azərbaycan qısa zamanda bonus daxil olmaqla, böyük sərmayələri cəlb edə bildi. Sözsüz ötən müddətdə Azərbaycan iqtisadiyyatına yönəldilən sərmayənin həcmində kəskin artımlar müşahidə olunub”.
Bu sözləri Pravda.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov deyib.
V.Bayramov qeyd edib ki, Azərbaycan xaricdə, o cümlədən Avropa İttifaqında sərmayə qoyuluşunu həyata keçirən dövlətdir: “İsveçrə daxil olmaqla, bir sıra Avropa ölkələrində Azərbaycanın, o cümlədən Dövlət Neft Şirkətinin investisiya qoyuluşları var. Bütün bunlar təbii ki, həm dövlət şirkətləri üçün, həm də özəl yerli biznes üçün imkanlar deməkdir. Çünki biznesdə investisiya portfelini genişləndirməyə çalışır. Yanlız ölkədaxili deyil, ölkə kənarında daha çox sərmayə qoyuluşları həyata keçirməklə daha çox gəlir əldə edir. Bu da sözsüz dövlətin gücünü eyni zamanda fiskal gəlirlərdəki artımı göstərən əsas faktorlardan biridir. Bu konteksdən birmənalı şəkildə məhz Azərbaycanın iqtisadi gücünün artması və bu gücün möhkəmlənməsi fonunda kiçik və orta sahibkarlar da daxil olmaqla, yerli biznes üçün yeni imkanların yaradılmasını müşahidə edirik”.
Şəhanə Quliyeva
