Səhər yeməyində ən çox seçilən qidalardan biri olan vafli və blinçik arasında hansı daha faydalıdır? Mütəxəssislər bildirirlər ki, hər iki məhsul oxşar tərkibə malik olsa da, hazırlanma üsulu və əlavə olunan inqrediyentlər onların qida dəyərinə ciddi təsir göstərir.
AzPost xəbər verir ki, bu barədə “Verywell Health” nəşri məlumat yayıb.
Vafli ilə blinçik arasındakı əsas fərq
Mütəxəssislərin sözlərinə görə, hər iki məhsul un, yumurta və süd kimi oxşar ərzaqlarla hazırlanır. Lakin vafli xəmirində adətən daha çox yağ və şəkər istifadə olunur. Bu isə ona xırtıldayan səth və yumşaq daxili quruluş verir.
Blinçiklər isə nisbətən daha az yağlı hesab olunur.
Araşdırmalara görə, bir orta ölçülü blinçikdə:
- 141 kalori;
- 3,7 qram zülal;
- 6 qram yağ;
- 17,7 qram karbohidrat olur.
Eyni ölçülü vaflidə isə:
- 210 kalori;
- 3 qram zülal;
- 11 qram yağ;
- 25 qram karbohidrat mövcuddur.
Bundan əlavə, vaflinin şəkər və xolesterin miqdarı da daha yüksəkdir.
Hansı daha faydalıdır?
Mütəxəssislər bildirirlər ki, ənənəvi reseptlə hazırlanan blinçiklərin qlisemik indeksi vaflidən bir qədər aşağıdır. Bu isə enerjinin daha uzun müddət sabit qalmasına kömək edə bilər.
Bununla belə, əsas məsələ seçilən əlavələrdir. Şərbət, çoxlu yağ və şirin souslar həm blinçikin, həm də vaflinin kaloriliyini xeyli artırır.
Daha sağlam hazırlamaq üçün nə etmək lazımdır?
“Nutrients” jurnalında yayımlanan araşdırmada qeyd olunur ki, balanslı səhər yeməyi qanda şəkərin sabit qalmasına və gün boyu enerjinin qorunmasına kömək edir.
Mütəxəssislər vafli və blinçiki daha faydalı etmək üçün aşağıdakı dəyişiklikləri tövsiyə edirlər:
- ağ un əvəzinə tam taxıllı undan istifadə etmək;
- şərbət yerinə təzə meyvə əlavə etmək;
- şəkəri azaltmaq;
- qatıq və yumurta kimi zülal mənbələrindən istifadə etmək;
- çia və ya kətan toxumu əlavə etmək;
- qoz-fındıq və yulafdan istifadə etmək.
Həmçinin marqarin əvəzinə zeytun və ya raps yağı daha sağlam seçim hesab olunur.
Mütəxəssislər qeyd edirlər ki, düzgün hazırlanarsa həm blinçik, həm də vafli faydalı və balanslı səhər yeməyinə çevrilə bilər.
