Azertag portalından verilən məlumata görə, ain.az xəbər yayır.
Bakı, 22 may, AZƏRTAC
BMT-nin Ümumdünya Şəhərsalma Forumunun 13-cü Sessiyası (WUF13) bu gün başa çatır. Nüfuzlu beynəlxalq tədbir mövzu ilə bağlı müxtəlif istiqamətləri əhatə edən qlobal dialoqla yanaşı, həm də xoş anlarla yadda qaldı.
Bakı şəhəri altı gün qlobal şəhərsalma və dayanıqlı inkişaf müzakirələrinin mərkəzinə çevrildi. Həmin müddətdə dünyanın ən müxtəlif nöqtələrindən Azərbaycan paytaxtına təşrif gətirən hökumətlərin və beynəlxalq təşkilatların nümayəndləri, tikinti və şəhərsalma sahəsində çalışan mütəxəssislər, memarlar və digər sahələrin təmsilçiləri urbanizasiya və şəhər inkişafının gələcək istiqamətlərinə ən müasir yanaşmaları müzakirə etdilər. Tədbir iştirakçıları həm də Azərbaycan paytaxtında xeyli təcrübə əldə etdilər, mənzil böhranının həlli sahəsində müasir yanaşmalara, urbanizasiya diplomatiyasının Azərbaycan modelinə yiyələndilər, “ağıllı şəhər” və “ağıllı kənd” konsepsiyası sahəsində ölkəmizdə tətbiq olunan son təcrübələri öyrəndilər. Ən başlıcası, burada həmkarlar arşında fikir mübadiləsi apardılar, şəhərsalma standartlarının yeni trendlərindən xəbər tutdular, özlərinə çoxlu tərəfdaş və dost qazandılar. Yüksək səviyyədə keçən forumda onların üzündəki təbəssüm, çöhrələrindəki xoş hisslər də yəqin ki, bununla əlaqədardır.
AZƏRTAC-ın WUF13-lə bağlı təqdim etdiyi növbəti fotoreportajda müxtəlif dillərdə danışan, ayrı-ayrı millətlərin nümayəndələrinin Bakının qonaqpərvər mühitində birləşən xarici qonaqların, tədbirin yerli iştirakçılarının üzlərindəki səmimi təbəssümlər əks olunub. Fərqli mədəniyyətlərin Bakıda bir araya gələrək yaratdığı bu unikal və rəngarəng harmoniya tədbirin rəsmi nəticələri qədər bəşəriyyət üçün böyük dəyər kəsb edir.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
