Bizimyol saytından verilən məlumata görə, ain.az xəbər verir.
Rusiyanın Ukraynaya qarşı apardığı müharibədə son aylarda vəziyyətin Moskva üçün daha mürəkkəb xarakter aldığı bildirilir.
Bizimyol.info xəbər verir ki, "The Wall Street Journal" nəşrinin təhlilinə görə, Ukrayna ordusu taktiki və texnoloji baxımdan müəyyən üstünlük əldə etməyə başlayıb. Bununla belə, ekspertlər hesab edirlər ki, hazırkı vəziyyət hələ müharibənin dönüş nöqtəsinə çevrilməyib və Kreml geri çəkilməyə hazır görünmür.
Nəşr yazır ki, Ukrayna Silahlı Qüvvələri son aylarda pilotsuz uçuş aparatlarından istifadədə və müdafiə taktikalarında əhəmiyyətli irəliləyiş əldə edib. Xüsusilə orta mənzilli dronların effektiv tətbiqi Rusiyanın cəbhə arxasındakı logistika sistemlərinə, komanda məntəqələrinə və hava hücumundan müdafiə vasitələrinə ciddi zərbələr endirməyə imkan verir. “Hornet” və “FP-2” kimi pilotsuz aparatların istifadəsi nəticəsində Rusiya ordusunun ön xəttdəki əməliyyatları çətinləşib.
Hərbi analitik Franz-Stefan Gady bildirib ki, Ukrayna gözləniləndən daha güclü mövqedə olsa da, müharibə daim dəyişən prosesdir və Rusiya da yeni şəraitə uyğunlaşmağa çalışır. Onun sözlərinə görə, yaxın həftələr cəbhədəki vəziyyətin necə dəyişəcəyini müəyyənləşdirəcək.
Məlumata görə, Rusiyanın 2026-cı ildə cəbhədəki irəliləyişi son iki ilin ən zəif göstəricisi hesab olunur. Analitiklərin hesablamalarına əsasən, Rusiya ordusu hər ay on minlərlə itki verir. Eyni zamanda Ukrayna qüvvələri ötən il Rusiyanın geniş istifadə etdiyi “gizli irəlliləmək” taktikasına qarşı daha effektiv mübarizə aparmağa başlayıb. Ukraynalı hərbçilər pilotsuz aparatların və xüsusi mobil qrupların köməyi ilə mövqelərdən gizli keçməyə çalışan rus əsgərlərini aşkar edib zərərsizləşdirirlər.
Bununla yanaşı, Ukraynanın əsas problemlərindən biri insan resurslarının çatışmazlığı olaraq qalır. Bu səbəbdən Ukrayna ordusu lokal uğurlar əldə etsə də, genişmiqyaslı əks-hücum imkanları məhdud hesab olunur. Lakin ekspertlər qeyd edirlər ki, 2025-ci ildən fərqli olaraq, hazırda cəbhənin bəzi hissələrində təşəbbüs artıq yalnız Rusiyanın əlində deyil.
Nəşr yazır ki, Rusiyada da müharibənin iqtisadi yükü hiss olunmağa başlayıb. Yüksək müqavilə bonusları hesabına yeni hərbçilərin cəlb edilməsi dövlət büdcəsinə ciddi təzyiq yaradır. Bununla belə, artan neft qiymətləri Moskvanın gəlirlərini qismən artıraraq bu təzyiqi müəyyən qədər yumşaldıb.
Alexander Gabuev hesab edir ki, Kreml hələ də Ukraynanın sonda zəifləyəcəyinə inanır. Onun fikrincə, məhz bu səbəbdən Vladimir Putin hazırda müharibə məqsədlərindən geri çəkilməyə meylli görünmür.
Nəşr qeyd edir ki, bəzi Qərb analitikləri yaxın dövrdə atəşkəs ehtimalını istisna etməsələr də, hazırkı mərhələdə müharibənin yaxın zamanda tam başa çatacağına dair aydın əlamətlər müşahidə olunmur.
Qadir, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
