Ötən ayın 19-da ABŞ Hərbi Dəniz Qüvvələri tərəfindən saxlanılan İrana məxsus "Touska" yük gəmisinin heyətinin təxliyəsi başa çatıb.
Pakistan Xarici İşlər Nazirliyinin sözçüsü Tahir Hüseyn Əndrabi Amerika şirkəti X-in sosial media paylaşımında 22 heyət üzvünün ölkəyə gəldiyini açıqlayıb.
O, heyət üzvlərinin İran hakimiyyət orqanlarına təhvil veriləcəyini və gəminin özünün zəruri təmir işləri başa çatana və gəmi qanuni sahibinə qaytarılana qədər müvəqqəti olaraq Pakistanın ərazi sularında qalacağını qeyd edib.
Əndrabi prosesin həm İran, həm də Amerika tərəflərinin birgə dəstəyi ilə əlaqələndirildiyini vurğulayıb. Bəyanatda deyilir: "Pakistan bu cür etimad quruculuq tədbirlərini alqışlayır və regional sülh və təhlükəsizlik üçün vasitəçilik səylərini dəstəkləyərkən dialoq və diplomatiyanı təşviq etməyə davam edəcək".
ABŞ Mərkəzi Komandanlığının (CENTCOM) sözçüsü Tim Hokins ABC News telekanalına 22 heyət üzvünün sonradan İrana qaytarılması üçün Pakistana köçürülməsinin başa çatdığını təsdiqləyib.
O, həmçinin gəminin sahibinə qaytarılacağını bildirib.
İran xəbər agentliyi “Tasnim”in məlumatına görə, adı açıqlanmayan bir iranlı məmur 28 heyət üzvündən altısının artıq azad edilərək İrana qaytarıldığını və qalan ekipaj üzvlərinin azad edilməsi üçün səylərin davam etdiyini bildirib.
Daha əvvəl ABŞ Prezidenti Donald Tramp Oman körfəzindən gələn və Hörmüz boğazından keçməyə cəhd edən İran yük gəmisi “Touska”nın aprelin 19-da saxlanıldığını açıqlamışdı.
Rizvan CƏFƏROV,
“Azərbaycan”
